Bir neçə ay əvvəl Google Asistentlə bağlı vacib bir yenilik ortaya çıxmışdı. Hansı ki, Google hesabınızda qeydiyyatda olan hansısa bir şifrə internetə sızdırılarsa və ya oğurlanmış şifrələrlə əlaqəli verilənlər bazasında daxil olarsa, asistent sizə bu barədə xəbərdarlıq verəcəkdi. Çox yaxşı bir addım olsa da bu sistemin işləməsi üçün asistent yetəri qədər effektiv olmadı. Bəzi istifadəçilərin Google asistentdən istifadə etməməsi, bəzi ölkələrdə yeniliyin istifadəyə verilməsindəki ləngimələr belə bir xüsusiyyətin varlığını şübhə altında qoydu. Lakin verilən məlumata görə Google şirkəti nəinki şifrələrinizi, bütün şəxsi məlumatlarınızla bağlı təhlükəsizliyinizi qoruyacaq xəbərdarlıq sistemi hazırlayır.
Yeni sistemlə birlikdə Google sizinlə bağlı şəxsi məlumatları birbaşa xəbərdarlıq bildirişi kimi cihazınıza göndərəcək
Axtarış sistemini təkmilləşdirməyə davam edən Google, axtarış sistemindəki istifadəçilərin şəxsi məlumatlarını da qorumağa diqqət yetirir. Google SearchLiaison rəsmi tviter hesabı üzərindən verilən məlumata görə yeni ildən başlayaraq internetdə görünən şəxsi məlumatlarınızla bağlı xəbərdarlıq alacaqsınız. Hesabınızda qeydiyyata alınmış telefon nömrəsi, elektron poçtunuz, varsa ev adresi məlumatlarınız və bunun kimi bir çox şəxsi məlumatlarınız axtarış sistemi tərəfindən daim analiz ediləcək.
Əgər şəxsi məlumatlarınızdan biri və ya bir neçəsi Google axtarış sistemində əks olunarsa, sistem bununla bağlı sizə xəbərdarlıq edəcək. Məlumatınızın qeyri-rəsmi bir saytda Google axtarış sistemi tərəfindən göstərilildiyi bildirişini aldıqdan sonra məlumatın axtarış sistemində görünüb-görünməməsini tələb edə bilirsiniz. Aydın məsələdir ki, həmin məlumat üçüncü tərəf bir saytdan silinə bilməz. Lakin Google şirkəti həmin məlumatın axtarış sistemində görünməsinin qarşısını alır.
İndiyə qədər istifadəçilər öz şəxsi məlumatlarının qanunsuz göstərildiyi bir mənbəni axtarış sistemindən çıxarmaq üçün müəyyən mərhələlərdən keçmək lazım idi. Lakin indi proses olduqca asanlaşacaq. Yenilik hal-hazırda bəzi istifadəçilər tərəfindən test edilir. 2023-cü ildən etibarən bütün istifadəçilərdə bu xüsusiyyətin aktiv olması planlaşdırılır.
