Yəqin ki, bir çoxlarınız beyninizdə düşündüyünüz hansısa mahnını fit çalaraq və ya özünüz oxuyaraq axtarmağı düşünmüsünüz. Əslində belə bir xüsusiyyət bir müddət əvvəl Google tərəfindən istifadəyə verilmişdi. Google ilə səsli axtarışa daxil olub musiqini oxuyaraq axtarmağı cəhd edə bilərsiniz. Eyni zamanda Google asisstent ilə də bənzər şeyi qeyd edilənə görə həyata keçirmək mümkündür. Lakin Google şirkəti musiqi servisləri cəhətdən çox populyar olmadığı üçün bu xüsusiyyət istifadəçilər üçün çox yararlı və bilinən bir şeyə çevrilməyib. Spotify platformasının əsas rəqiblərindən biri olan Deezer isə öz mobil tətbiqində mırıldanaraq musiqi axtarmaq funksiyasını istifadəyə verib.
Deezer istər mırıldanmaq, istər fit çalmaqla musiqi axtarışlarında yaxşı nəticə göstərir
Tətbiq daxilində axtarış bölməsinə girdikdə SongCather xüsusiyyətini görəcəksiniz. SongCatcher düyməsinə toxunduqdan sonra hansısa musiqini mırıldamaq və ya fitlə oxumaqla axtarışı həyata keçirə bilərsiniz. Tətbiq lazımi mahnını tapdıqda isə düzgünlüyünü təsdiq edəcəyiniz təqdirdə musiqi birbaşa siyahınıza əlavə olunur. İndiyə qədər SongCatcher funksiyası Shazam kimi sadəcə musiqini axtarmaq üçün istifadə olunurdu.
Deezer şirkətinin rəsmiləri tərəfindən qeyd edilən məlumata görə mırıldanaraq musiqi axtarmaq yeniliyi alqoritmlərin inkişafı ilə daha da yaxşı işləyəcək. Platforma daxilində mırıldanaraq axtarılan hər musiqi 90 milyonluq verilənlər bazasının təkmilləşdirilməsinə yarayacaq. Şirkət yeniliyin necə işlədiyini isə aşağıdakı videoda qısaca göstərib. Qeyd edək ki, xüsusiyyətin işləməsi üçün premium abunəliyin tələb olunub-olunmaması ilə bağlı məlumat verilməyib. Spotify tətbiqində olduğu kimi, Deezer də ödənişli abunəlik sisteminə malikdir.
