Samsung şirkəti də digər Çinli brendlər kimi model çeşidliliyini xeyli artırıb. Galaxy A seriyası altında çıxan onlarla smartfon, Galaxy S seriyası flaqmanları, Galaxy M seriyası və.s ilə saysız-hesabsız model bazara çıxarılır. Smartfonlar çıxarıldıqdan sonra dəstəyin verilməsi də xeyli çətinləşir. Məsələn, elə flaqman Galaxy S seriyasında S2X, S2X+, S2X Ultra deyə 3 model çıxarıldıqdan sonra əlavə olaraq S2X modelinə çox bənzəyən S2X FE təqdim edilir. Elə keçən il Galaxy S21 seriyası debüt etdikdən nə az, nə çox düz 1 il sonra Galaxy S21 FE satışa çıxarılmışdı. Bunun müxtəlif səbəbləri var, lakin Galaxy S22 seriyasından bir ay əvvəl tanıdılmış Galaxy S21 FE modeli biraz mənasız alınmışdı. Bəlkə də şirkət smartfonu may ayından hazırlamağa başlamışdı deyə, çəkilmiş əziyyəti yox etmək istəmirdi. Ona görə gecikmiş də olsa Galaxy S21 FE təqdim edildi. Yeni ortaya çıxmış detallara görə isə Galaxy S22 FE ümumiyyətlə ləğv edilib.
Galaxy S22 FE modeli istehsalçının planında mövcud deyil
SamMobile tərəfindən verilmiş məlumata görə Cənubi Koreya nəhəngi bu il Galaxy S22 FE modelinin il sonuna qədər hazır olması üçün işə başlamayıb. Keçən il bu vaxtlar Galaxy S21 FE modelinə aid nəinki texniki detallar məlum olmuşdu, smartfonun render görüntüləri belə məlum idi. Hətta iyun ayından etibarən hər 3 həftədən bir smartfon təqdim ediləcək deyə xəbərlər gəlirdi. İnsanlar Galaxy S21 FE ilə bağlı xəbər görməkdən bezmişdi, amma şirkət smartfonu təqdim etməməklə bağlı sanki qəti qərar vermişdi.
Galaxy S22 FE barədə isə keçən il olduğu kimi iyun ayında olmağımıza baxmayaraq hər hansı bir məlumat mövcud deyil. SamMobile-ın etibarlı qaynaqlarından gələn məlumata görə SM-S900 ilə bağlı hazırlıq görülmür. Cihazın varlığını təsdiqləyən heç bir şey yoxdur. Böyük bir ehtimalla Note seriyasına bənzər şəkildə sakit və səssiz formada FE xətti də tərk ediləcək. Fikrimizcə FE xəttinin ləğv edilməsi alıcıları elə də maraqlandırmayacaq. Həmçinin Note seriyasının istehsalını dayandıran və S-Pen xüsusiyyətini Galaxy S seriyasına verən Samsung üçün də FE xətti o qədər önəmli olmamalıdır. Galaxy S22 FE ləğv edilib İddialarının doğru olub-olmadığını öyrənmək üçün bu ilin sonunadək gözləmək məcburiyyətindəyik.
