Yerə, göyə, avtomobillərə, sosial şəbəkələrdən tutmuş kriptovalyutalara qədər hər yerə uzanan Elon Musk indi də yerin altında güclənməyə çalışır. Yer üstü avtomobil nəqliyyatında tıxaclar, avtomobillərin sıxlığı kimi hallar hər kəs üçün əsl problem mənbəyinə çevrilib. İnnovativ həll yolları axtardıqca daim maraqlı nəticələr ortaya çıxır. Üstəlik bir fikrə Elon Musk rəhbərlik edirsə alınacaq nəticə mütləq ki, fantastik sözü ilə ifadə edilməyə daha uyğun olacaq. Həmin fantastik fikir isə başlıqdan da gördüyünüz kimi Boring Company tərəfindən hazırlanılan “Vegas Loop” layihəsidir. Boring Company 2018-ci ildə SpaceX-dən ayrılıb vahid bir şirkət kimi Elon Musk rəhbərliyində fəaliyyət göstərir. Şirkətin əsas məqsədi Las Veqasın altında elektromobillər, Tesla modelləri üçün metro məntiqi ilə işləyən geniş tunel şəbəkəsi yaratmaqdır.
Boring Company tunel qazmaqla bağlı icazələr alıb
Vegas Loop layihəsi ilk təsdiq edildiyi vaxtlar 51 stansiyanı bir-birinə bağlayan tunel şəbəkəsi kimi planlaşdırılmışdı. Bu şəbəkə ümumi uzunluğu 46 km olan marşrutdan ibarət olacaqdı. Yeni alınmış icazə ilə birlikdə tunel 55 stansiya sayına çatdırılacaq və ümumi uzunluğu 54 km təşkil edəcək. Şirkət yeni xətlərin qazıntısına 2023-cü ildən başlaya biləcək. Las Vegas Review jurnalı tərəfindən verilmiş məlumata görə Harry Reid Beynəlxalq Hava Limanı, Allegiant stadionu və şəhər mərkəzindəki bir neçə yerə yeni stansiyalar əlavə ediləcək. Hər bir stansiyanın açılmasına Boring Company təqribi 1,5 ilə 20 milyon dollar arasında vəsait xərcləyəcək.
Təbii ki, bu tuneldən istifadə edərək 20 dəqiqəlik məsafəni bir neçə dəqiqəyə getmək istəyən sürücülər müəyyən ödəniş etməli olacaqlar. Məsələn, Fremont Street Experience və Harry Reid Beynəlxalq Hava Limanı arasındakı təqribi 12 km məsafə üçün 12 dollar ödəmək lazım gələcək. Əslində tunellərin prinsipcə gələcəkdə avtonom hərəkət üçün əlverişli olacağını düşünmək olar. Tunel dar olduğundan sürücülərin avtomobili sürətlə sürməsi biraz çətindir. Avtopilot isə sürücüdən fərqli olaraq tunel daxilində sürətli hərəkəti rahatlıqla təmin edə bilər. Elə bu il keçirilmiş CES sərgisində də bu tunellər həm nəqliyyatı təmin etmək üçün, həm də bir növ reklam xarakterli istifadəyə verilmişdi. Nəticə bəzi sürücülər üçün gözlədikləri qədər heyrətamiz deyildi. Ona görə layihənin təkmilləşdirilməsinə və avtonomlaşdırılmasına ehtiyac var.
