Texnologiya sahəsi təkmilləşdikcə texnologiya nəhənglərinin cihazları da təkmilləşir. Lakin smartfonlar nə qədər təkmilləşsə də onların zədələnməsindən, deformasiya olmasından qaçmaq mümkün olmur. Yəqin ki, hərkəs smartfon zədələndikdə onu ilk özü təmir etmək istəyir. Lakin vəziyyətin qəliz olduğunu gördükdən sonra ustaya müraciət etmək lazım gəlir. Bəs hansı smartfonları daha asan və daha çətin təmir etmək olur? Electronics Hub bu sualın cavabını tapmaq üçün araşdırma edib və nəticədə ən asan, ən çətin təmir edilən smartfonlar ilə bağlı hesabat verib. Ən çətin təmir edilə bilən model Google Pixel brendinə məxsus olduğu halda, ən asan təmir edilən model Motorolla brendinə məxsusdur.
Ən asan təmir olunan smartfonlar hansılardır?
Qeyd etdik ki, ən asan təmir olunan smartfonlar siyahısında birinci yeri Motorolla brendinə məxsus olan Moto G7 modeli tutur. Belə ki, bu model ortalama olaraq 25 dəqiqə ərzində təmir edilə bilir. Araşdırma zamanı smartfonların orta təmir müddəti və təlimatların mürəkkəblik səviyyəsi nəzərə alınıb. Yəni qısa olaraq desək, hansı smartfon sadə formada evdə təmir edilə bilinirsə onlar siyahıda qeyd olunub. Maraqlısı budur ki, Samsung brendinin Galaxy A40 və Galaxy S22 Ultra modelləri Apple brendinin iPhone 11 Pro Max modelini ötə bilib. Belə ki, müvafiq olaraq smartfonların orta təmir müddəti 32.6 dəqiqə, 48.1 dəqiqə və 63.2 dəqiqə olub. Hətta siyahının daha aşağılarında 67.8 dəqiqə orta təmir müddəti ilə iPhone 13 modeli yer alır.
iPhone 14 modeli 47.7 dəqiqə orta təmir müddətinə sahib olsa da təlimatları mürəkkəb olduğundan siyahının aşağısında yer alır. Siyahıda Poco brendinə məxsus modellər də yer alır. Belə ki, Poco M3 modeli 35.6 dəqiqə, Poco F3 isə 51.2 dəqiqə orta təmir müddətinə məxsusdur. Beləliklə Electonics Hub tərəfindən tərtib olunan ən asan və ən çətin təmir edilə bilən smartfonlar siyahısına əsasən Samsung brendi ən asan təmir oluna bilən modellərə sahibdir.
Ən çətin təmir olunan modellər hansılardır?
Electronics Hub tərəfindən tərtib edilən ən çətin təmir olunan smartfonlar siyahısına isə ötən il təqdim edilən Google Pixel 7 modeli liderlik edir. Belə ki, smartfonun orta təmir müddəti 60.3 dəqiqədir. Təəccüblüdür ki, ikinci sırada 58.4 dəqiqə orta təmir müddəti ilə Samsung Galaxy Note 10 modeli dayanır. Ən asan təmir olunan smartfonlar siyahısında lider olan Samsung, bu siyahıda da yer alır. Samsung bu siyahıda da Apple brendini qabaqlayıb. Belə ki, ondan sonra Apple brendinə məxsus üçüncü nəsil iPhone SE modeli yer alır. Qeyd edək ki, bu modelin orta təmir müddəti 55.6 dəqiqədir. Siyahının davamında 53.8 dəqiqə ilə Redmi Note 7, 53.6 dəqiqə ilə Xiaomi Mi9 və 45.5 dəqiqə ilə Redmi Note 11 Pro modelləri mövcuddur. Həmçinin siyahının sonunda Samsung brendinə məxsus Galaxy A72 və Galaxy A53 5G modelləri də yer alır. Xatırladaq ki, Electronics Hub araşdırma edərkən yalnız orta təmir müddətini deyil həm də təlimatların mürəkkəblik səviyyəsini nəzərə alıb.
Nəticə olaraq isə deyə bilərik ki, Electronics Hub tərəfindən tərtib edilən ən asan və ən çətin təmir olunan smartfonlar siyahısında ən yaxşı nəticə Samsung modellərinə məxsusdur. Ən pis göstərici isə Google brendinin Pixel modlelərinə məxsus oluna bilər. Hətta bu araşdırma Samsung brendinin ötən aylarda təqdim etdiyi Galaxy S23 seriyasının bazarda daha yaxşı mövqe tutmasına səbəb ola bilər.
