Meta-nın baş direktoru Mark Zukerberq bu ilin əvvəlində şirkətin iş modelini süni intellekt ətrafında ciddi şəkildə dəyişdirməyi planlaşdırıb. Reuters-in daxili sənədlərə və 20-dən çox mənbəyə əsaslanan məlumatına görə, plan çərçivəsində bəzi komandaların əməkdaş sayı 60 faizə qədər azaldıla, onların gördüyü işlərin əhəmiyyətli hissəsi isə süni intellekt agentlərinə həvalə oluna bilərdi.
Meta daxilində “Project OT” adı verilən planın əsas məqsədi şirkəti süni intellektin iş proseslərinin mərkəzində olduğu bir struktura çevirmək idi. Bu modeldə daha kiçik insan komandaları fəaliyyət göstərəcək, gündəlik və təkrarlanan tapşırıqların böyük hissəsini isə avtonom süni intellekt agentləri yerinə yetirəcəkdi.
Lakin söhbət Meta-nın bütün işçilərinin 60 faizinin ixtisar edilməsindən getmirdi. Şirkətin Reuters-ə açıqlamasına görə, 60 faizlik azalma yalnız bəzi komandalar üçün nəzərdən keçirilən ssenarilərdən biri olub. Plan həmçinin müəyyən əməkdaşların ixtisar edilmək əvəzinə başqa vəzifələrə keçirilməsini nəzərdə tuturdu.
Restrukturizasiyanın iki mərhələdə — may və noyabr aylarında həyata keçirilməsi planlaşdırılmışdı. Meta may ayında işçi qüvvəsinin təxminən 10 faizini ixtisar edib. Lakin ikinci mərhələnin hazırlıqları son anda dayandırılıb.
Bunun əsas səbəblərindən biri əməkdaşların ciddi narazılığı olub. İşçilər şirkətin onları tədricən süni intellektlə əvəz etməyə hazırlaşdığını düşünməyə başlayıblar. Xüsusilə Meta-nın əməkdaşların klaviatura düymələrinə basmasını və siçan hərəkətlərini izləyəcək sistem hazırlaması böyük etiraz yaradıb.
Bu sistem vasitəsilə insanların kompüterdə müxtəlif tapşırıqları necə yerinə yetirdiyi qeydə alınmalı və əldə edilən məlumatlardan həmin işləri gələcəkdə süni intellekt agentlərinə öyrətmək üçün istifadə olunmalı idi.
Ancaq problem yalnız əməkdaşların etirazı olmayıb. Süni intellektin şirkətdə məhsuldarlığı gözlənilən səviyyədə artırmadığı da ortaya çıxıb. Daxili məlumatlara əsasən, Meta-nın kod sistemində edilən dəyişikliklərin sayı il ərzində 220 faiz artsa da, istifadəçilərə təqdim edilən yeni və ya yenilənmiş funksiyaların sayı cəmi 36 faiz artıb.
Süni intellekt agentlərinin istifadəsi bəzi texniki problemləri də artırıb. Reuters-in əldə etdiyi sənədlərə görə, ciddi texniki insidentlərin və potensial məlumat sızmalarının sayı 40 faiz yüksəlib. Əməkdaşların bu problemləri həll etməyə sərf etdiyi vaxt isə 70 faiz artıb.
Nəticədə Meta ilkin planlarının bir hissəsindən geri çəkilməyə başlayıb. Şirkət əməkdaşların kompüter fəaliyyətini izləmək üçün nəzərdə tutulan proqramı dayandırıb, bəzi işçilərə süni intellekt bölmələrindən əvvəlki komandalarına qayıtmağa icazə verib.
Mark Zukerberq iyul ayında əməkdaşlarla görüşündə şirkətin süni intellekt agentlərinin inkişaf sürətini düzgün qiymətləndirmədiyini də etiraf edib. Onun sözlərinə görə, süni intellekt agentləri Meta-nın gözlədiyi qədər sürətlə inkişaf etməyib.
Şirkətin süni intellektlə bağlı yanaşmasında da müəyyən dəyişiklik müşahidə olunur. Zukerberq avqust ayında yayımladığı yazıda süni intellektin əsas məqsədinin insanların gördüyü işi tamamilə avtomatlaşdırmaq deyil, insanların imkanlarını artırmaq olduğunu bildirib.
Bununla belə, Zukerberq gələcəkdə süni intellektin inkişafı nəticəsində şirkətlərin daha az sayda əməkdaşla fəaliyyət göstərə biləcəyini də istisna etməyib.
