Apple şirkətinin gələn ay yeni Vision Pro qarışıq reallıq eynəyini satışa çıxaracağı artıq hərkəsə məlumdur. Lakin indi ortaya çıxıb ki, Apple Vision Pro sifariş etmək istəyənlər ilk öncə uyğun ölçünü müəyyən edə bilmək üçün üzlərini skan etməlidilər. Hətta Vision Pro eynəyini sifariş etmək istəyənlər daha bir neçə mərhələdən keçmək məcburiyyətində qalacaqlar. Ümumiyyətlə Apple Vision Pro istifadəçinin üzünə tam uyğunlaşmaq üçün müxtəlif aksessuarlar tələb edən məhsuldur. Görünən odur ki, Apple müştərilərin məmnuniyyəti üçün əlindən gələni edir.
Apple Vision Pro sifariş etməyə hazırlaşanlar onlara uyğun ölçüləri almaq üçün Apple Store tətbiqi vasitəsi ilə üzlərini üçölçülü skan etməlidirlər. Hələlik Apple şirkəti rəsmi olaraq belə açıqlama elan etməsə də, Apple Store tətbiqində aşkarlanan kodlardan birində məhz bu ifadə mövcuddur, “Apple Vision Pro ölçüsünü müəyyən etmək üçün üzünüzü skan edə bilərsiniz”. Bu skan istifadəçilərə müvafiq ölçü barədə məlumat verəcək, beləliklə istifadəçilər sifariş verərkən doğru ölçünü təxmin etmək məcburiyyətində qalmayacaqlar.
Qeyd edək ki, Apple fevralın 2-də satışa çıxaracağı Vision Pro modelinin bütün istifadəçiləri üçün uyğunlaşmasını təmin etmək üçün müxtəlif ölçülü baş bandı və yüngül yastıqlar təklif edəcək. Hələli qarışıq reallıq eynəyinin ölçüləri barədə məlumat olmasa da, Apple şirkətinin qutuda 2 fərqli band ilə müştərilərini məmnun etməyə çalışacağı məlumdur. Əlavə olaraq məlumat verək ki, Vision Pro modelinin ilkin sifarişləri yanvarın 19-dan etibarən başlayacaq və fevralın 2-də rəsmi olaraq satışa çıxarılacaq. O cümlədən 256GB yaddaşa malik olan eynəyin qiyməti 3500 dollar olaraq müəyyən edilib.
