Bildiyimiz kimi, ABŞ-ın Çindən gələn texnologiya məhsullarına tətbiq etdiyi yüksək tariflər Apple-ı tədarük zəncirində strateji dəyişikliklər etməyə vadar edib. Reuters agentliyinin məlumatına görə, Apple Hindistandan ABŞ-a 600 ton iPhone göndərib. Bu addımın səbəbi isə artıq hər kəsə aydındır: Tramp administrasiyasının artan tariflərindən qaçmaq.
Dünyanın ən böyük texnologiya şirkətlərindən biri olan Apple, Çinə tətbiq edilən 125 faizlik idxal rüsumunun təsirinə düşməmək üçün Hindistanda istehsalını sürətləndirib. Apple, Chennai şəhərindəki Foxconn müəssisələrində istehsal edilən təxminən 1,5 milyon ədəd və ya 600 ton iPhone-u ABŞ-a daşımaq üçün altı yük təyyarəsi kirayələyib. Hər biri 100 ton tutumlu bu təyyarələrin mart ayından etibarən müntəzəm olaraq ABŞ-a göndərildiyi, sonuncunun isə bu həftə göndərildiyi bildirilir. Burada tarixlərə diqqət çəkmək lazımdır. Söz-söhbətlər olsa da, ABŞ prezidenti Tramp ötən həftə qarşılıqlı gömrük rüsumlarını açıqlayıb və yüksək tariflər bu həftə qüvvəyə minib. Bu səbəbdən də, yeni vergilərdən əvvəl, Apple ABŞ-da iPhone-ları depolamağa başlayıb.
Məlumatlara görə, Apple Hindistanda istehsal sürətini artırıb və həmçinin göndərmə prosesini sürətləndirmək üçün tədbirlər görüb. Bildirilir ki, ölkədə gömrük prosedurlarının müddətini 30 saatdan 6 saata endirmək üçün lobbiçilik fəaliyyəti aparılır. “Yaşıl dəhliz” adlanan bu xüsusi proqram əvvəllər Çində Apple tərəfindən istifadə edilən modelə bənzər şəkildə işləyir. Mənbələr göstərir ki, Apple Hindistan hökumətindən Baş nazir Modinin dəstəyi ilə sürətləndirilmiş gömrük prosesini planlaşdırmaq və qurmaq üçün təxminən səkkiz ay vaxt sərf edib. Apple istehsalının böyük hissəsi hələ də Çində olsa da, Hindistanın payı sürətlə artır. Counterpoint Research-in məlumatına görə, hazırda ABŞ-a idxal edilən iPhone-ların beşdə biri Hindistandan gəlir. Şirkətin iki əsas tədarükçüsü olan Foxconn və Tata-nın Hindistanda üç fabriki var və daha ikisi tikilir.
Apple-ın bu strateji addımının ən böyük əsaslandırması artan gömrük rüsumlarının cihaz qiymətlərinə təsiridir. Tramp ABŞ-ın Çinə tətbiq etdiyi tarifləri davamlı olaraq artıraraq, çərşənbə günündən etibarən 54 faizdən 125 faizə qaldırıb. Çinə tətbiq edilən 125 faizlik rüsum Hindistana qoyulan 26 faizlik rüsumdan xeyli yüksəkdir. Bu arada onu da qeyd edək ki, Tramp Çindən başqa bütün ölkələrdə vergi tənzimləmələrini 90 gün müddətinə dayandırıb. Hesablamalara görə, 54 faizlik gömrük rüsumunun ABŞ-da 1599 dollara satılan iPhone 16 Pro Max-ın qiymətini 2300 dollara qaldıracağı deyilirdi. Hətta indi rüsumun 125% olması bu qiymətin daha da çox ola biləcəyinə işarə edir.
