Uzun müddətdir gözlənilən Apple-ın ilk qatlana bilən modeli ilə bağlı yeni məlumatlar ortaya çıxıb. Belə ki, bu gün ortaya çıxan xəbərə görə, Apple şirkətinin ilk qatlana bilən iPhone modeli Galaxy Z Flip kimi ola bilər. Hələlik texnologiya nəhənginin yeni təqdim edəcəyi qatlana bilən model üçün tarix verilməsə də onun hansı dizayna sahib olacağı ilə bağlı iddialar ortaya çıxıb. Qeyd edək ki, şirkətin indilərdə konsept sınaqlarını keçirdiyi ilk qatlana bilən modelinin Galaxy Z Flip kimi şaquli qatlanacağı məlum olub.
Şaquli qatlana bilən formada 2 fərqli konsept üzərində çalışdığı bildirilən Apple rəqabətdən geri qalsa da heç tələsmir. Görünən odur ki, texnologiya nəhəngi ən yaxşı qatlana bilən modelini hazırlayaraq bazara girməyə hazırlaşır. Ümumiyyətlə Apple şirkəti qarışıq reallıq və ya VR tərəfində də bir neçə il rəqabətdən geri qalsa da, təqdim etdiyi Vision Pro ilə ən yaxşı VR gözlüyünü bazara çıxarıb. Habelə Apple şirkətinin qatlana bilən ekran infrastrukturu Galaxy Z Flip kimi modellərə rəqib olacaq. Onu da qeyd edək ki, şirkətin ilk olaraq iPad modelində yeni dizayndan istifadə edəcəyi gündəmdədir.
Apple uzun müddətdir ki, LG Display və Samsung Display kimi şirkətlərdən qatlanan ekran nümunələrini alır və sınaqlar həyata keçirir. Şirkət qatlana bilən ekranlı iPad-in dizaynını bu sınaqlara uyğun olaraq daim yeniləyir. Lakin son məlumatlara görə, Apple şirkəti 2026-cı ildən əvvəl qatlana bilən ekranlı ilk cihazını bazara təqdim etmək fikrində deyil.
