Apple ötən gecə yeni M3 seriyalı prosessorlarını, iMac və Macbook Pro modellərini təqdim edib. Biz artıq M3 seriyalı prosessorlar və iMac modelləri barədə məlumat verdik. İndi isə keçək Macbook Pro modellərinə. Hollywood bayramına uyğun olaraq baş tutan Scary Fast tədbirində Apple yeni Macbook pro seriyalı cihazlarını bizlərə təqdim etdi. Qeyd edək ki, bir neçə versiyada təqdim edilən yeni Macbook Pro modellərinin ən sadə versiyası belə sələfindən bir neçə dəfə çox performans təklif edir. Yeni Macbook Pro modellərinin ən böyük təkmilləşdirməsi texniki tərəfdə olsa da, indi daha qaranlıq rəng palitrası Space Black istifadəçilərə təklif olunur.
Qeyd edək ki, yeni Space Black rəng seçimi daha az barmaq izi tutur. Ümumiyyətlə yeni Macbook modelləri M3, M3 pro və M3 Max olmaqla 3 ayrı prosessor ilə təklif olunur. Maraqlısı budur ki. Apple M3 prosessorlu Macbook Pro modellərini də 8-512GB yaddaş seçimi ilə təklif edir. Hətta iMac modelində belə bu yaddaş seçimi hələ də minimum olaraq qalır. Görünən odur ki, Apple hələ də 8GB ram seçimindən əl çəkmək niyyətində deyil. Bundan əlavə bütün Macbook Pro modelləri Liquid Retina XDR displeylərə, güclü dinamik sistemə, SD kart oxuyucusu, Thunderbolt çıxışına sahib olub.
Performans tərəfində şübhəsiz inkişaf mövcuddur. Belə ki, yeni M3 prosessoru GPU tərəfində 35%, CPU tərəfində isə 65% yüksək performansa malikdir. Onu da qeyd edək ki, M3 modeli gündəlik işlərin həyata keçirilməsi üçün ideal performans təklif edir. M3 Pro prosessoruna sahib 14 və 16 düymlük Macbook Pro isə daha çox performans və əlavə yaddaş təklif edərək, tədqiqatçılar, bloggerlər üçün nəzərdə tutulur. Son olaraq M3 Max prosessorlu Macbook Pro modeli hazırda mövcud olan Macbooklar arasında ən güclüsüdür. Bu model istifadəçilərə fasiləsiz olaraq yüksək performans təklif edir. Qiymət tərəfində isə 14 düymlük M3, M3 Pro və M3 Max prosessorlu Macbook Pro modelləri müvafiq olaraq 1599$, 1999$, 3199$ başlanğıc qiymətinə sahib olub. 16 düymlük Macbook Pro modelləri isə prosessorlarından asılı olaraq 2499$, 3499$ qiymət etiketinə sahib olub.
