Ötən aylarda dünyanın ən məşhur avtomobil istehsalçılarından biri olan Toyota şirkətinin öz elektromobillərində mexaniki transmissiyadan istifadə etmək istədiyini xəbər vermişdik. İndi isə Toyota elektromobilləri üçün hazırlanmış mexaniki transmissiya sistemi sınaqdan keçirilir. Qeyd edək ki, Arstechnica”nın jurnalisti mexaniki transmissiya sisteminin ən son versiyasını yaponiyada sınaqdan keçirib. Ümumiyyətlə bu gün elektrikli avtomobillərdə standart daxili yanma mühərrikli avtomobillərdə olduğu kimi mexaniki transmissiya sistemi mövcud deyil. Əslində son dövrlərdə təqdim edilən bir çox avtomobildə heç mexaniki transmissiya seçimi də olmur. Lakin Toyota mexaniki transmissiyadan əl çəkmək istəmir.
Xüsusilə böyük şəhərlərdə sürücülər avtomatik transmissiya sistemindən istifadə etdiyi üçün bu gün avtomobil nəhəngləri də mexaniki transmissiya sisteminə çox üstünlük vermir. Bununla belə, hələ də mexaniki sürətlər qutusunu sevən sürücülər var. Məhz bu sürücülər elektrikli avtomobillərdə mexaniki sürətlər qutusunun olmamasından şikayətlənir. Toyota isə ötən ildən elektromobilləri üçün mexaniki transmissiya sistemi hazırlamağa başlayaraq sürücülərin diqqətini çəkmişdi. Qeyd edək ki, şirkət yeni sistemini Lexus UX300e prototipi üzərində sınaqdan keçirir.
Toyota brendinin mexaniki transmissiya sisteminin arxasında Isami Yoichiro dayanır. Məhz ortaya çıxan pedal sistemi də onun tərəfindən hazırlanıb. Bu texnologiyanın məqsədi daxili yanma mühərriki ilə işləyən mexaniki transmissiyalı avtomobilin hissini təqlid etməkdir. Rəqəmsallaşdırılmış sistemdən istifadə edərkən qaz və mufta pedalları arasındalı balans klassik olaraq qorunmalıdır. Hətta bunun üçün mütəxəssislər xüsusi işləyiblər.
