AnTuTu iyun ayının ən performanslı (Android ƏS ilə çalışan) 10 flaqman smartfonunun siyahısını paylaşıb. İyun ayının nəticələrinə görə, top onluğa əsasən Snapdragon 8 Gen 1 çipseti ilə çalışan cihazlar daxil olub. Amma MediaTek şirkətinin çipsetləri ilə çalışan modellər də bu onluğa daxil ola bilmişdir.
Bu isə o deməkdir ki, Qualcomm və MediaTek şirkətləri arasında hələ də rəqabət davam edir. AnTuTu iyun reytinqinə daxil olan 8 smartfon Snapdragon 8 Gen 1 çipsetini, 2 smartfon isə MediaTek Dimensity 9000 çipsetini alıb.
AnTuTu İyun reytinqinin ən güclü 3 modeli
İyun reytinqinin birinci pilləsində Xiaomi şirkətinin alt brendinə aid olan Black Shark 5 Pro (16/512GB) oyun modeli tutub. Cihaz sınaqlarda 1.040.111 xal toplaya bilmişdir. Bu göstərici həmçinin sürətli yaddaş texnologiyaları (SSD+UFS 3.1) hesabına əldə edilmişdir.
İkinci pilləni kiçik fərq ilə Red Magic 7 Pro (12/256GB) modeli tuta bilib. Cihaz 1.031.867 xal toplayıb. Top üçlüyün sonuncusu Lenovo Legion Y90 (12/256GB) modeli olub. Hansı ki, aktiv soyutma sistemi ilə təmin edilib. Bu xüsusiyyətin hesabına cihaz 1.016.346 xal toplaya bilmişdir.
Dördüncü və beşinci pillələrə iQOO 9 (12/512GB)və iQOO 9 Pro (12/512GB) modelləri sahiblənib. Nəticələri isə 1008842 və 1005116 xal təşkil edir.
MediaTek də AnTuTu reytinqinə daxil olmağı bacarıb
Bu modellərin ardıyca siyahıda Vivo X80 (8/256GB) və OPPO Find X5 Pro (12/256GB) modelləri 6-cı və 7-ci pillələri tutub. Hər iki model MediaTek Dimensity 9000 çipseti ilə çalışır. AnTuTu iyun reytinqinin 8-ci və 9-cu pillələrində Vivo X80 Pro (12/256GB) və iQOO Neo 6 (12/256GB) modelləri yer alıb. Xiaomi 12 Pro (12/256GB) modeli isə 976.031 xal toplayaraq sonuncu pillədə yer alıb.
