Xiaomi şirkəti bu gün yay ayı üçün keçirəcəyi ən mühim tədbirdə Xiaomi 12S seriyasını təqdim edəcək. Bu təqdimatdan əvvəl sizlərə Xiaomi 12S Ultra modelinin ortaya çıxmış canlı görüntülərini paylaşa bilərdik. Lakin elə bir neçə saata başlayacaq tədbirdən sonra Xiaomi 12S Ultra və Xiaomi 12S seriyası ilə tanış olsaq daha yaxşı olar. Ona görə də gəlin ilk öncə geniş miqyaslı təqdimat tədbiri keçirilmədən ölkəmizdə anons olunmuş Xiaomi 12 Lite barədə danışaq. Belə ki, Xiaomi Azerbaijan tərəfindən yeni orta-üst seqment modelin texniki detalları və qiyməti paylaşılıb. “Mənim stilim, mənim şəklim şüuarı” altında təqdim edilən Xiaomi 12 Lite modelinin sizə nə vəd etdiyindən qısaca bəhs edək.
Xiaomi 12 Lite modelinin qiyməti və texniki xüsusiyyətləri məlum olub
Belə ki, Xiaomi şirkətinin təqdim etdiyi smartfon öz gücünü əvvəlcədən də bizə məlum olduğu kimi Snapdragon 778G çipsetindən alır. Xiaomi 11 Lite 5G NE modelindən bizə tanış olan çipset ortalama bir orta-üst seqment performansı vəd edir. Bazardakı bir çox cihazda gördüyümüz Snapdragon 778G çipseti işlərinizi yetəri qədər görməyi bacaracaq gücdədir. Lakin performans olaraq öz sələfindən çox fərqlənmədiyini qeyd etməliyik.
6.55 düymlük AMOLED ekran panelinin görüntü yeniləmə tezliyi 120Hz təşkil edir. Bu ekran Dolby Vision və HDR10+ dəstəyinə malikdir. Görüntünü yetərincə dolğun və geniş rəng dərinliyində göstərə bilən ekran paneli sizə müsbət təcrübə yaşada bilər. Smartfonun ekran panelinin ölçüsü Xiaomi 12 modelinin 6.28 düymlük ekran paneli ilə Xiaomi 12 Pro modelinin 6,73 düymlük ekran panellərinin arasında dəyişir. Xiaomi 12 qədər kompakt olmasa da Xiaomi 12 Pro qədər böyük deyil. Xiaomi burda da ideal ortanı seçmək qərarı alıb.
Ölçüdən danışmışkən smartfon 173 qramdır. Qalınlığı isə 7,29mm təşkil edir. Yenə sələfi Xiaomi 11 Lite seriya modelləri ilə müqayisə etsək çəkisi 20 qram, qalınlığı 0.49 mm yüksəlib. Lakin bu fiziki xüsusiyyətləri ilə birlikdə bazarda xeyli yüngül və nazik smartfonlardan biri olmağı bacarır. Smartfonun gövdəsi POCO F4 modeli kimi kəskin xəttlərə sahibdir. Arxa tərəfdə şüşə materiala sahib qapaq işlədildiyi deyilir. Lakin gövdə yanılmırıqsa plastik tərkibli materialdan hazırlanıb. İcmalını hazırlasaq, bu barədə sizə daha dəqiq məlumat verməyə çalışacağıq.
Dizaynı arxa tərəfdən Xiaomi 12 seriyasına bənzəsə də kamera modulu nisbətən nazik və uzundur. Baş kamera sensoru Redmi Note 11 Pro modellərindəki kimi 108MP təsvir ölçülü ISOCELL HM2-dir. 1/1.52″ düymlük bu sensor uzun müddətdir orta seqment cihazlarda işlədilir. Digər 2 kamera isə standart formada 8MP təsvir ölçülü ultra-geniş bucaqlı və 2MP makro sensorlarından ibarətdir. Sevindirici bir hal var ki, selfi kamerası ənənəvi 20MP yerinə 32MP sensorla əvəzlənib.
Smartfonun 4300mAs batareyası 67Vt sürətli doldurma dəstəkləyir. Yeni nəsil “Turbo Şarj” xüsusiyyəti ilə birlikdə batareyanın 50% doldurulması iddialara görə təqribi 13 dəqiqə çəkir. Smartfonun həm alt, həm üst hissələrində səs ucaldanlar quraşdırılıb. Beləliklə həqiqi stereo effekti vəd edir. Qeyd edək ki, cihaz Dolby Atmos səs keyfiyyətini də dəstəkləyir.
Qiyməti
Hələ ki, yalnız 6/128GB yaddaş variantına sahib olduğu deyilən modelin qiyməti 999AZN təşkil edir. Xiaomi 12 Lite modelini ilkin sifariş müddətində alan şəxslər 100AZN endirimlə, 899AZN ödəyərək cihazı əldə edə biləcəklər.
