Boston Dynamics şirkəti tamamilə elektrikli yeni Atlas adlı robotunu təqdim edib. Qeyd edək ki, yeni versiyası ilə qarşımıza çıxan Atlas inanılmaz qabiliyyətlərə sahib olduğundan bütün diqqətləri öz üzərinə cəlb edib. Ümumiyyətlə, son dövrlərdə texnologiya nəhəngləri robotexnika sahəsində həqiqətən inanılmaz işlərə imza atır. Məhz yeni təqdim edilən Atlas robotu da bu işlərdən sadəcə biri hesab oluna bilər. Sadəcə bir neçə il əvvəl hərəkət qabiliyyətləri sadəcə irəli və ya geri getməklə məhdudlaşan robotlar indi imkansızı bacarır.
Beləliklə, ötən gün Boston Dynamics məşhur Atlas robotunun köhnə versiyasını təqaüdə çıxardı və bu gün şirkət tamamilə yenilənmiş elektrikli Atlas robotu ilə qarşmızdadır. Yenilənmiş Atlas robotunun ən əsas xüsusiyyətləri isə inanılmaz qabiliyyətlərə sahib olması və kifayət qədər səssiz işləməsidir. O cümlədən, yeni nəsil Atlas robotu çevikliyi, elastikliyi və hamar hərəkətləri ilə diqqət çəkir. Xatırladaq ki, bundan əvvəl istifadə olunan Atlas robotu hidravlik əsaslı olduğundan olduqca yüksək səs çıxarırdı. Boston Dynamics bildirir ki, yeni versiya onilliklər ərzində aparılan tədqiqatlara əsaslanır Boston Dynamics-in Spot və Stretch ilə başladığı kommersiyalaşdırma addımını davam etdirir.
Şirkət sadəcə qısa video ilə yeni robotunu təqdim etsə də, olduqca yüksək maraq cəlb edib. Robot başını və gövdəsini yerində 180 dərəcə döndərə bilir. Əslində robotun bu xüsusiyyəti böyük mübahisələrə səbəb olub. Bu səhnə bizə daha çox filmlərdə rastlaşdığımız qatil robotları xatırladır. Başı yuvarlaq və daha insanabənzər bədənə sahib olan Atlas, elektrik mühərriklərinin dəstəyi ilə daha səssiz, daha elastik və daha sürətli bir quruluşa malikdir. Həcmli və ağır görünüşünü itirən və dərisini sözün əsl mənasında dəyişən Atlas günümüzün müasir robotlarının yəni Apptronik Apollo, Sanctuary AI Phoenix və Tesla Optimus kimi robotların dizaynını əks etdirir.
