Avtomobil bazarına yenicə daxil olan Xiaomi şirkəti bu dəfə tam elektrikli deyil, hibrid avtomobil üzərində çalışır. Belə ki, texnologiya nəhəngi artıq hibrid avtomobil üçün insanları işə götürməyə də başlayıb. Bundan əlavə, Xiaomi sözçüsü təsadüfən iş təsviri və tələbləri əks etdirən skrinşot yerləşdirərək şirkətin hibrid avtomobil texnologiyası üzərində işlədiyini aşkar edib.
Gizmochina-nın məlumatına görə, Xiaomi ilk hibrid avtomobili üzərində işləyir. Şirkət “avtomobilin temperaturunun idarə olunması texnologiyası üçün marşrutun planlaşdırılması və qrafikin işlənib hazırlanmasına” cavabdeh olacaq mühəndisləri işə götürür. Namizədlər avtomobil sənayesində 15 ildən çox təcrübəyə, istilik idarəetmə inteqrasiyasında 10 illik təcrübəyə malik olmalı və ikidən çox hibrid və ya uzun məsafəli nəqliyyat vasitələrinin hazırlanmasına cavabdeh olmalıdırlar. Ümumiyyətlə, əvvəllər Xiaomi prezidenti Lei Jun yeni avtomobillə bağlı suallara cavab verməkdən yayınırdı.
Bununla belə, Xiaomi-nin ikinci avtomobilinin bu ilin sonunda buraxılması və 2025-ci ildə satışa çıxarılması planlaşdırılan krossover olması ilə bağlı şayiələr var. Qeyd edək ki, Xiaomi Motors şirkəti SU7 elektromobili üçün 100 000-dən çox sifariş alıb və iyun ayında təxminən 10.000 avtomobil tədarük edib. Xiaomi ilk modeli ilə avtomobil bazarında adından söz etdirməyi bacarmış və rekordlara imza atmışdı. Bəs sizcə şirkətin yeni hibrid modeli bu uğuru davam etdirə biləcək?
