Qualcom şirkəti bu gün Snapdragon 8 gen 3 və Snapdragon X Elite prosessorları barədə ortaya çıxan məlumatlar ilə gündəmdədir. Belə ki, texnologiya nəhənginin çoxdandır gözlənilən yeni flaqman prosessorlarının hansı xüsusiyyətlərə sahib olacağı artıq məlum olub. Görünən odur ki, yeni Snapdragon X Elite Apple şirkətinin M seriyalı prosessorlarına rəqib olacaq. Bu prosessor 12 “Oryon” performans nüvəsi üzərində qurulub.
Əvvəlcə Snapdragon 8 gen 3 çipsetinə barədə ortaya çıxan detallara nəzər salaq. Ümumiyyətlə flaqman çipsetin bu yaxınlarda təqdim ediləcəyi artıq məlumdur. Hətta bir çox platformada test edilən bu çipsetin performansı da təxminən bizə məlumdur. Qeyd edək ki, yeni ortaya çıxan məlumatlara görə Snapdragon 8 Gen 3, sələfindən 20 faiz daha yüksək səmərəlilik və 30 faiz daha yüksək performans, həmçinin 25 faiz daha çox məhsuldarlıq təklif edir. Xüsusilə süni intellekt tərəfində bu çipset 98% performans artımına malik olub. Bu çipset ilə təchiz ediləcək smartfonların bazarda ən güclü smartfonlar olacağını deyə bilərik.
Snapdragon X Elite prosessorları isə Oryon əsaslı 12 nüvəyə sahibdir. 4.3 GHz-ə qədər tezliyə sahib olan bu nüvələr prosessorun performansına ciddi müsbət təsir göstərir. Qeyd edək ki, bu nüvələr vasitəsi ilə prosessor eyni vaxtda 3 fərqli 4K ekrana güc verə bilər və 5G, Wifi-7 kimi texnologiyaları dəstəkləyə bilər. O cümlədən 136 GB/s LPDDR5X operativ yaddaşı dəstəkləyən prosessor yüksək səviyyəli quraşdırılmış süni intellekt imkanlarına malikdir. Bundan əlavə prosessor 64GB LPDDR5X-8533 yaddaşını da dəstəkləyir.
