Son dövrlərdə smartfon bazarı ilə bağlı bir neçə iddialar ortaya çıxmışdı. Belə ki, bu iddialar əsasən bazarın artıq satış səviyyəsinin azalması ilə bağlı idi. İndi isə Counterpoint analitik şirkətinin yayımladığı hesabata görə məlum olub kİ, bu ilin 3-cü rübündə smartfon satışları ciddi səviyədə azalıb. O cümlədən smartfon satışlarında liderlik Apple şirkətindən Samsung şirkətinə keçib. Qeyd edək ki, hesabata görə smartfon satışları əvvəlki illə müqayisədə 8% azalıb. Lakin əvvəlki rüblə müqayisə etsək vəziyyət stabildir.
Smartfon bazarındakı satışların aşağı düşməsi əlbəttə ilk növbədə texnologiya nəhənglərinə təsir göstərib. Belə ki, bu vəziyyətdən ən çox zərər çəkən Xiaomi oldu. Çinli smartfon nəhənginin satışları 15% azalıb. Hesabat dövrünün sonunda isə lider məhz bütün tədarüklərin 20% hissəsini təşkil edən Samsung oldu. Görünən odur ki, Galaxy Z Flip5 modeli bütün tənqidlərə baxmayaraq populyar olmağı bacarıb. Siyahının ikinci sırasında isə 16% ilə Apple şirkəti dayanır. Üçüncü sırada da, Xiaomi şirkəti 12% göstərici ilə dayanır. Oppo, Vivo kimi brendləri isə müvafiq olaraq 10% və 8% göstərici ilə 4,5-ci yerlərdə məkan tutub.
Apple bu dəfə Samsung şirkətindən geri qalsa da, analitiklər iPhone 15-in təqdimatının gecikmiş təsiri səbəbindən dördüncü rübdə əksər əsas bazarlarda satışların yaxşılaşacağını gözləyirlər. O cümlədən Hindistanda və Çində yaxınlaşan bayram günləri səbəbi ilə satışlar bir xeyli artacaq. Lakin bütün bunlara baxmayaraq ilin sonunda ümumi smartfon satışı göstəricisi son 10 ildə qeydə alınmış göstəricilər arasında ən aşağısı ola bilər.
