Bildiyimiz kimi, smartfonların ən əsas xüsusiyyətləri onların kamera, ekran və prosessor performansından əlavə yenilənmə dəstəyidir. İndiyə qədər bir çox texnologiya nəhəngləri cihazlarına sadəcə 5 il ərzində yenilənmə dəstəyi göstərirdi. Lakin son dövrlərdə bu göstərici artıq dəyişib. O cümlədən Samsung şirkəti də öz smartfonları üçün daha uzun müddət yenilənmə dəstəyi göstərmək üçün hazırlıqlara başlayıb. Xatırladaq ki, ötən günlərdə Google yeni Pixel 8 və 8 Pro modellərini təqdim etmişdi. Məhz bu tədbirdə şirkət yeni smartfonlarına 7 il yenilənmə dəstəyi göstərəcəyini bildirmişdi. Bu isə Google şirkəti üçün yenilənmə tərəfində yeni addım hesab olunur.
Maraqlısı budur ki, indi də Samsung öz smartfonları üçün daha uzun müddət yenilənmə dəstəyi göstərmək istəyir. Görünən odur ki, cənubi koreyalı texnologiya nəhəngi rəqibindən geri qalmaq istəmir. Hətta bu barədə şirkətin təşkil etdiyi konfransda Mobile eXperience şöbəsinin baş mühəndisi və meneceri Shin-Chul Baik danışıb. Shin-Chul Baik mobil cihazların təhlükəsizliyinə cavabdeh olan komandanın tərkib hissəsidir. Onun sözlərində görə şirkət gələcəkdə 5 il yenilənmə standartını dəyişmək niyyətindədir. Hətta bu barədə hazırlıqlara da başlanılıb.
Lakin onu da qeyd etmək lazımdır ki, Samsung bu qərarı almaq üçün daha çox məsuliyyəti öhdəsinə götürməlidir. Çünki, Google-dan fərqli olaraq Samsung yüzə yaxın smartfon seriyasına sahibdir. Hətta şirkət hər il 10 milyarddan çox yenilənmə buraxır. Bunun üçün isə texnologiya nəhəngi böyük məbləğlərdə sərmayə qoyub. Gələcəkdə isə proqram təminatı tərəfində yenilənmə dəstəyi daha da uzanacaq. Belə ki, Samsung 5 il Android, 2 il təhlükəsizlik yenilənmə dəstəyi təklif edə bilər.
