Beləliklə, Samsung şirkətində işləyərkən icazəsiz olaraq OLED texnologiyaları ilə bağlı əldə etdiyi məlumatları Çinə sızdıran mühəndis məhkəmədə həbs edilib. Bildiyimiz kimi, hazırda ölkələr arasında xüsusilə texnologiya nəhəngləri arasında şiddətli rəqabət mövcuddur. Bu rəqabətdə isə təcrübəli mühəndislərin şirkətlər arasındakı mövqeyi xüsusi əhəmiyyət kəsb edir.
Hazırda isə Çin şirkətləri təcrübəli mühəndis cəlb etmək əvəzinə böyük şirkətlərdən texnologiyaların sızdırılmasına üstünlük verirlər. Samsung brendi dünyada OLED texnologiyası üzrə ixtisaslaşdığı üçün Çinli şirkətlərin əsas hədəfinə çevrilib. Şiddətli rəqabətə sahib olan bazarda Çin şirkətləri OLED texnologiyasını Samsung daxilində işləyən mühəndisə vasitəsi ilə sızdıra bilib. Görünən odur ki, Çin texnologiya transferi mövzusunda yazılı qaydalara əməl etmək niyyətində deyil.
Samsung-da işləyərkən 2018-2020-ci illər arasında OLED texnologiyalarını gizli şəkildə Çin şirkətlərinə satdığı aşkarlanan mühəndis məhkəmədə həbs edilib. Samsung-dan ayrıldıqdan sonra öz ekran şirkətini quran mühəndisin bu şirkət vasitəsilə Çinə 24,5 milyon dollarlıq texnologiya transfer etdiyi bildirilir. Qeyd edək ki, mühəndis ötən ilin oktyabrından həbsdə idi. Məhkəmə dövlət sirrinin oğurlanmasına görə həmin mühəndisə uzun müddətə həbs qətimkan tədbiri seçib. Məhkəmənin qərarı ilə həmin şəxs 6 il müddətinə azadlıqdan məhrum edilib. Bundan başqa, həmin şəxsə kömək etdiyi aşkarlanan 5 Samsung işçisi də müxtəlif həbs cəzalarına məhkum edilib. Qeyd edək ki, Samsung işçiləri iki və ya üç il aralığında həbsə məhkum edilib.
