Bir neçə ay sonra yeni flaqman smartfon seriyasını təqdim etməyə hazırlaşan Samsung boş dayanmır. Belə ki, cənubi koreya mərkəzli Samsung indi mühüm rola malik Exynos çipsetlərinin adını dəyişməyi düşünür. Ümumiyyətlə Exynos çipsetləri çox uzun müddətdir ki, bazardadır. Samsung brendi daha ucuz smartfon istehsal edə bilmək və çipset tələbatının bir qismini özü qarşılaması səbəbi ilə bu çipsetləri hazırlamışdı. Maraqlısı budur ki, Exynos çipsetləri hazırda bazarda olan digər flaqman çipsetlər qədər yüksək səviyyədə deyil. Lakin yenə də bu çipsetlər Samsung brendi üçün smartfon və digər texnologiya istehsalında mühüm rol oynayır.
Samsung mühün rola malik olan Exynos çipsetlərinin indi adını dəyişməyi düşünür. Qeyd edək ki, ortaya çıxardığı məlumatlarla məşhur olan X istifadəçilərindən birinin yeni iddiasına görə, Samsung Exynos çipsetlərinin adını dəyişərək Dream Chip etməyi planlayır. Samsung şirkətinin bu addımı isə Snapdragon çipsetlərindən hər zaman bir addım geridə qalan Exynos çipsetlərinə qarşı olan mənfi düşüncələri və tənqidləri yoxa çıxartmaq üçün ola bilər. Belə ki, cənubi koreyalı texnologiya nəhəngi yeni Dream Chip ilə tamamilə yeni bir səhifə aça bilər.
Hələlik şirkətin belə bir dəyişiklik edib-etməyəcəyi məlum deyil. Lakin bu adın şirkətin daxilində qurulan Dream Team adlı xüsusi qrupdan gəldiyi məlumdur. 2022-ci ildə bu komanda yüksək səviyyəli mühəndislərdən təşkil olunub. Habelə onlar yeni nəsil mobil prosessorlar üzərində işləyirdi. Görünən odur ki, Dream Team artıq yeni mobil prosessor hazırlayıb və Samsung dərhal çipsetlərinin adını dəyişərək yenilik etməyə can atır. Lakin onu qeyd edək ki, Galaxy S24 seriyası dəqiq olaraq Snapdragon 8 Gen 3 və Exynos 2400 çipsetləri ilə qarşımızda olacaq.
