Nvidia, materialların real vaxt rejimində göstərilməsini sürətləndirmək üçün süni intellektdən istifadə edən, performansı 24 dəfəyə qədər artırmağı vəd edən “Neural Appearance Models” adlı yeni yanaşma təklif edir. Belə ki, “Neural Appearance Models” adlı yeni yanaşma ilə Nvidia şirkəti oyunlarda inanılmaz yeniliklərə imza ataraq inqilab edəcək. Ümumiyyətlə, hər ötən gün təqdim edilən oyunlar qrafik cəhətdən daha da yaxşılaşır və reallığa uyğunlaşdırılır.
Nvidia şirkətinin yeni texnologiyası ilə isə biz oyunlarda yer alan materialların real olub olmadığını fərqləndirə bilməyəcəyik. Qeyd edək ki, hazırda oyunlarda qrafik cəhətdən mükəmməl səviyyədə görünüş hissini əks etdirmək üçün həm vaxt, həm də emal gücü tələb olunur. Nvidia isə “Neural Appearance Models” adlı yeni bir yanaşma təklif edərək real vaxt rejimində render prosesini sürətləndirməyi vəd edərək inqilab edir. Nvidia incə detallardan mürəkkəb işıqlandırma effektlərinə qədər obyektin hər bir təfərrüatını çəkmək üçün intensiv hesablama qrafikasına etibar etmək əvəzinə neyron şəbəkələrdən istifadə edir. Bu yanaşma nəinki daha sürətli hesablamağa, həm də mürəkkəb vizual səhnələr üçün xüsusilə faydalı olan daha ətraflı vizuallaşdırmaya imkan verir.
Şirkətin məlumatına görə, bu innovativ yanaşma ənənəvi üsullarla müqayisədə 24 dəfəyə qədər performans artımını təmin edir. Xatırladaq ki, Nvidia ötən il Neural Compression texnikasını təqdim edərkən, bu yeni üsul tekstura göstərilməsi və kölgələmə performansının sürətləndirilməsinə diqqət yetirir deyə açıqlama vermişdi. Yeni yanaşma rəssamlar tərəfindən çəkilmiş real obyektlər, və ya generativ süni intellektdən istifadə edərək mətn göstərişlərindən yaradılan real obyektlər də daxil olmaqla bir çox mənbədən olan bütün materiallara tətbiq oluna bilər. Yeni model emal ediləcək obyektin toz, su ləkələri, cızıqlar, işıqlandırma kimi hər bir detalını və hətta müxtəlif işıq mənbələri və rənglərinin qarışığından yaranan şüalar kimi inanılmaz dəqiq detalları vizuallaşdırmağa kömək edir. Ən sadə formada ümumiləşdirsək: Oyundaxili obyektlər həmişəkindən daha yaxşı görünəcək.
