Bildiyimiz kimi, NVIDIA brendi ötən il öz dəyərini dəfələrlə artırmağı bacardı. Bunun əsas səbəbi isə süni intellekt sənayesinin sürətli inkişafı idi. Belə ki, OpenAI və digər süni intellekt nəhəngləri bütün sürətləndirici tələbatını NVIDIA şirkətindən təmin edirdi. O cümlədən NVIDIA özü də DLSS, RTX kimi bir çox süni intellekt əsaslı texnologiyaları ilə böyük istifadəçi kütləsinə sahib olmuşdu. İndi isə ortaya çıxıb ki, NVIDIA şirkəti TSMC-nin Apple-dan sonra ikinci ən böyük müştərisi oldu. Ümumiyyətlə, TSMC ənənəvi olaraq müştəri münasibətlərinin təfərrüatlarını açıqlamır, lakin ABŞ qanunlarına əsasən gəlirinin 10 faizindən çoxunu əldə edən müştəriləri açıqlamağı tələb olunur.
Keçən il, TSMC-nin ABŞ Qiymətli Kağızlar və Birja Komissiyasına (SEC) təqdim etdiyi sənədlərdə “Müştəri A” kimi qeyd edilən Apple, Tayvanlı podratçının gəlirinin 25 faizini təşkil edən 17,52 milyard dollar ödəyib. “Müştəri B” kimi siyahıya alınan NVIDIA TSMC-yə 7,73 milyard dollar ödəyib ki, bu da Tayvan şirkətinin gəlirinin 11 faizini təşkil edir. Qeyd edək ki, 2022-ci ildə şirkəin ilk 10 müştərisi xalis gəlirin 82%-ni təşkil etsə də, ötən il bu göstərici 91%-ə yüksəlib. Həmçinin bu şirkətlər arasında MediaTek, AMD, Qualcomm, Broadcom, Sony ve Marvell də var.
Apple illərdir ki, TSMC-nin ən böyük müştərisidir və gələcək illərdə də bu statusu qoruyub saxlamağa hazırlaşır. AMD, MediaTek və Qualcomm son illərdə sifarişlərini artırsalar da, heç bir başqa müştəri uzun müddətdir ki, Tayvanlı podratçıya xalis gəlirin 10 faizindən çoxunu gətirməyib. Süni intellekt texnologiyasındakı inkişaf NVIDIA-nın H100 və A100 sürətləndiricilərinə görünməmiş tələbata səbəb oldu. Qeyd edək ki, H100 və A100 süni intellekt sürətləndiriciləri də daxil olmaqla NVIDIA-nın kompleks məhsulları təkcə TSMC-də istehsal olunmur, həm də şirkətin özəl CoWoS texnologiyasından istifadə edərək orada qablaşdırılır.
