Nothing şirkətinin qurucusu olan Carl Pei-nin sözlərinə görə brendin ilk smartfonu Nothing Phone (1) çox da uğurlu alınmayıb. Bu barədə Carl Pei, şirkətin rəsmi youtube səhifəsində açıqlayıb. Belə ki, bu ilin yay aylarında təqdim olunan və hərkəs tərəfindən səbrsizliklə gözlənilən smartfon şirkətə gözlənilən qədər xeyir gətirməyib. Xatırladaq ki, Nothing Ear (1) qulaqlığı ilə məhşurlaşan şirkət yeni smartfonunu təqdim etməzdən öncə yeni səhmdar axtarışına çıxmışdı. Hətta bu zaman şirkətin planladığından dəfələrlə çox məbləğ toplanmışdı. Buna səbəb isə şirkətin özünəməxsus dizayna sahib smartfonunun hərkəs tərəfindən maraq doğurması idi.
Nothing Phone (1) smartfonunun uğursuz alınmasının səbəbi
Hərkəs tərəfindən maraqla gözlənilən smartfonun satışa çıxarıldıqdan sonra müxtəlif problemləri ortaya çıxmışdı. Belə ki, bu problemlər ən çox ekran panelindən qaynaqlanan qüsurlar tərəfində özünü göstərmişdi. Məhz bu problemlər və texniki cəhətdən smartfonun zəif olması istifadəçiləri məyus etmişdi.
Qeyd edək ki, Şirkətin qurucusu olan Carl Pei-nin sözlərinə görə Nothing Phone (1) smartfonunun istehsalı şirkət üçün 360 dollara başa gəlirdi. Əvvəlcə 405 dollara satılan smartfon sonralar 450 dollar civarına satılmışdı. Lakin smartfonun uğursuz olmasının əsas səbəbi onun əlavə xərcləri idi. Belə ki, logistik və telekommunikasiya operatorlarına çəkilən xərclər 88 dollar təşkil edirdi. Nəticədə smartfonun satışı şirkətə demək olar ki, heç bir xeyir gətirməyib.
Buna baxmayaraq Carl-ın sözlərinə görə Hindistan bazarında vəziyyət bir qədər yaxşı olub. Buna səbəb isə smartfonun ölkə daxili istehsal olunması olub. Yəni şirkət logistikaya heç bir əlavə xərc çəkməyib. Həmçinin qeyd edək ki, şirkətin qurucusu Nothing-in hələki kiçik startap olduğundan bunun böyüdüləcək səhv olmadığını bildirib. Əlavə olaraq qeyd edək ki, müxtəlif mənbələrə görə, dünyada yarım milyondan çox Nothing Phone (1) satılıb. Təəssüf ki, şirkət bu satışlardan gözlənilən qədər gəlir əldə edə bilməyib. Lakin bütün çətinliklərə baxmayaraq Carl Pei gələcəkdə yeni flaqman smartfonun çıxarılacağını da istisna etməyib. Yaxın vaxtlarda isə Nothing Phone (2) modeli təqdim edilməyəcək. Şirkət əsas foksunu Nothing Phone (1) modelinə dəstəyi gücləndirməyə ayırıb.
