Ötən günlərdə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən haqsız rəqabət hallarının qarşısının alınması istiqamətində araşdırmalar aparılıb. Belə ki, Aztelekom və Baktelecom və ya Bakı Telefon Rabitəsi telekommunikasiya xirmətlərində də genişmiqyaslı araşdırmalar aparılıb. Araşdırma nəticəsində isə araşdırma aparılan telekommunikasiya xidmətləri barəsində bazarda əlavə üstünlük əldə etmək məqsədilə qiymətlərlə manipulyasiya edilməsi əlamətləri üzrə iş qaldırılıb.
Aztelekom və Baktelecom xidmətlərinin tarif haqqını qaldırma səbəbi nədir?
Qeyd edək ki, Dövlət xidməti Aztelekom və Baktelecom telekommunikasiya xidmətlərə bağlı özəl internet provayderlərindən çoxlu sayda müraciət ünvanlandığı üçün araşdırma başlanılıb. Həmçinin Dövlət xidməti müraciət edənlərin özəl internet provayder tariflərində olan qiymət artımı ilə bağlı şikayət etdiyini bildirib. Xatırladaq ki, ötən aylarda adı çəkilən telekommunikasiya xidmətləri, özəl internet provayderləri tarif haqqını qaldırmışdı. Dövlət xidmətinin araşdırma apardığı telekommunikasiya xidmətləri, bu artımın səbəbini yeni GPON texnologiyasının tətbiqi ilə əlaqələndirmişdi. Qeyd edək ki, GPON və ya Gigabit Passive Optical Network adlandırılan texnologiya fiber-optik kabellərin istifadəsi ilə bağlıdır.
Əlavə olaraq qeyd edək ki, Rəqəmsal İnkişaf və Nəqliyyat Nazirliyinə məxsus Baktelecom, GPON texnologiyasının tətbiqindən sonra 4 mbit/s və 10 mbit/s tariflərini ləğv edərək abunəçilərin daha sürətli internetə keçidini təmin etmişdi. Təbii ki, bu zaman tariflərin qiymətində də dəyişiklik baş verib. Belə ki, telekommunikasiya xidməti ləğv etdiyi xidmətləri 15 mbit/s və 30 mbit/s tarif paketinə köçürmüşdü. Bu zaman isə əvvəl aylıq ödənişi 10 manat olan tarif müvafiq olaraq 15 manat, aylıq ödənişi 12.5 manat olan tarif isə 18 manat olaraq təyin olunmuşdu. Qeyd edək ki, bu qiymətlər Aztelekom xidmətində sadəcə 30 mbit/s tarif paketində fərqlənirdi. Belə ki, burada aylıq ödənişi 15.5 manat olan tarif 18 manata qalxmışdı.
