Süni intellekt investisiyalarının sürətlə artması ilə məlumat mərkəzlərinin enerji istehlakı ABŞ-da yeni müzakirə mövzusuna çevrilib. ABŞ Prezidenti Donald Tramp son açıqlamasında bu yükün istehlakçıların deyil, məlumat mərkəzlərini quran böyük texnologiya şirkətlərinin üzərinə düşməli olduğunu söyləyir. Beləliklə, ABŞ prezidenti Donald Trump AI nəhənglərinə üz tutaraq sərf olunan elektrik enerjisi üçün pulun onlar tərəfindən qarşılanmalı olduğunu bildirib.
Tramp özünün Truth Social hesabındakı paylaşımda amerikalıların süni intellekt məlumat mərkəzləri səbəbindən daha yüksək elektrik enerjisi xərcləri ödəməsini istəmədiyini bildirib. Buna görə də, o, əsasən Microsoft kimi böyük texnologiya şirkətləri ilə danışıqlar apardığını və bu şirkətlərin “ədalətli paylarını ödəməli olduqlarını” açıqlayıb. Trampın sözlərinə görə, bu istiqamətdə ilk konkret addımların bu həftə atılması planlaşdırılır.
Bildirilir ki, ABŞ-da elektrik enerjisinin qiymətləri son illərdə inflyasiyadan yuxarı qalxıb. Xüsusilə də böyük məlumat mərkəzi investisiyaları olan bölgələrdə enerji infrastrukturunun genişləndirilməsi qiymətləri artırır. Senata göndərilən hesabatlar göstərir ki, bəzi bölgələrdə elektrik enerjisinin qiymətləri son beş ildə 200%-dən çox artıb. Hazırda Microsoft tərəfindən bu məsələ ilə bağlı rəsmi açıqlama verilməyib. Lakin şirkətin prezidenti və vitse-prezidenti Bred Smitin Vaşinqtonda keçiriləcək tədbirdə süni intellekt infrastrukturu və enerji xərcləri ilə bağlı qiymətləndirmələr aparması gözlənilir. Tədbir elanında Microsoft süni intellekt tərəfindən formalaşdırılan yeni dövrdə vacib infrastruktur investisiyalarını vurğulayıb.
Qeyd edək ki, Microsoft əvvəllər yerli etirazlardan sonra Kaledoniyada planlaşdırılan məlumat mərkəzi layihəsini ləğv etmişdi. Hətta, təkcə ötən il ABŞ-da oxşar səbəblərdən ən azı 25 məlumat mərkəzi layihəsi təxirə salınıb. Xüsusilə enerji qiymətlərinə təzyiq texnologiya nəhənglərini tənzimləyici orqanlarla münaqişəyə sala bilər.
