Microsoft ötən il bizlərə yeni Project Silica adlı şüşə yaddaş texnologiyasını təqdim etmişdi. İndi isə həmin texnologiya ilə bağlı maraqlar detallar paylaşılıb. Belə ki, şüşə yaddaş texnologiyası 7TB həcmlə artıq daha yüksək yazma sürətinə və minlərlə il ömrə sahib ola bilir. Xatırladaq ki, Microsoft bu texnologiyasını bizlərə ötən il təqdim etmişdi. Uzunmüddət məlumatları saxlaya bilmək üçün hazırlanmış Project Silica çox kiçik ölçüdə olmasına rəğmən 7TB yaddaş həcminə sahib olub. Şirkət tərəfindən paylaşılan son məlumata görə bu texnologiya əsasən bulud əsaslı serverlər üçün nəzərdə tutulub.
Bulud əsaslı serverlərdə məlumatlar bəzən illərlə saxlanılmalı olduğundan burada dayanıqlı və etibarlı yaddaş texnologiyalarından istifadə olunur. Microsoft şirkəti də yeni Project Silica texnologiyası ilə bu serverlərdə tələb olunan bütün şərtləri ödəyir. Belə ki, “Microsoft”un açıqlamasına görə, hər şüşə modul 7 terabayt məlumat saxlaya biləcək və 10 min il ömrə sahib olacaq. Ötən il gün üzünə çıxan bu layihə zamanla daha da təkmilləşdirildi və modulun yazı sürəti, o cümlədən sabitliyi artırıldı. Microsoft-un Kembric Araşdırma Mərkəzinin laboratoriya menecerinin müavini Ant Rowstronun sözlərinə görə, sərt disklərdə saxlanılan məlumatlar hər 5 ildən bir, lentlərdə saxlanılan məlumatlar isə ən geci 10 ildən bir yenilənməlidir. Lakin bəzən yüksək həcmli məlumatları, həmçinin media məlumatlarını yeniləmək çox uzun vaxt tələb edir.
Onu da qeyd edək ki, məlumatların yenilənməsi prosesi yüksək enerji istehlakına və məlumat itkisinə də yol açır. Şüşə üzərində qeydə alınan məlumatlar isə suya, cızıqlara, istilik və elektromaqnit təsirlərə davamlı olduğu üçün minlərlə il saxlanıla bilər. Bu şüşə modul üzərinə məlumatları qısa lazer impulsları voksel yəni 3D piksel kimi qeyd edir. Lakin hələ şirkətin qarşısına qoyduğu məqsədə çatmaq üçün hələ də aradan qaldırmalı olduğu problemlər var. Yəni bu texnologiya hələlik kommersiya baxımından hazır deyil.
