“The Verge” mənbəsi xəbər verir ki, Microsft insanların “Google”dan istifadə etdiklərini düşünsələr də, Bing axtarış sistemindən istifadə etmələri üçün aqressiv və mübahisəli yeni hiyləyə əl atıb. Belə ki, Microsoft hesabınıza daxil olmadan Bing axtarış sisteminə “Google” yazsanız, Google səhifəsinə çox bənzəyən səhifəyə yönləndiriləcəksiniz. Beləliklə, Microsoft, istifadəçilərini “əlində saxlamaq” üçün onlara Bing-i Google kimi göstərməyə başlayıb.
Açılan pəncərədə axtarış paneli, Google Doodle-a bənzər bir şəkil və hətta axtarış panelinin altında Google-da olduğu kimi kiçik bir mətn mövcuddur. Microsoft hətta nəticələrin yuxarısında görünən öz Bing axtarış çubuğunu gizlətmək üçün səhifəni avtomatik olaraq bir az aşağı sürüşdürür. Bununla belə, Google-u təqlid edən axtarış çubuğunda axtarış etsəniz, adi Bing axtarış nəticələri səhifəsinə aparılacaqsınız. Həmçinin, əgər istifadəçi Microsoft hesabına daxil olarsa, bu hiylə işləməyəcək. Digər axtarış sorğuları xüsusi “Google-a bənzər” interfeys olmadan müntəzəm Bing axtarış nəticələrini verəcəkdir.
Əslində Microsoft bu addım ilə Microsoft yeni kompüter alan və adətən olduğu kimi Google Chrome-u tapmaq üçün standart Microsoft Edge brauzerindən istifadə edən istifadəçiləri hədəfləyir. Microsoft əvvəllər istifadəçiləri Google və Chrome əvəzinə Bing və Edge-ə keçməyə təşviq etmək üçün müxtəlif mübahisəli üsullardan istifadə edib. Xüsusilə son bir neçə il ərzində Microsoft Chrome yükləmə saytlarını “aldadıb”, Windows üçün Google Chrome-a pop-up reklamlar daxil edib, Chrome yükləmə səhifələrində sorğular yerləşdirib və hətta istifadəçilərin Google-dan imtina etməsi üçün zərərli proqrama bənzər pop-uplar yaradıb. Qeyd etmək lazımdır ki, Google da istifadəçiləri öz ekosisteminə cəlb etməyə çalışır, məsələn, istifadəçiləri Microsoft Edge əvəzinə Chrome-u yükləməyə təşviq etmək üçün vebsaytlarda bildirişlərdən istifadə edir, lakin bu, Microsoft qədər aqressiv görünmür. Microsoft artıq Bing-i Google kimi göstərməklə hiyləgər addım atmağa başlayıb.
