Lay’s bildiyimiz kimi dünyanın ən böyük çips istehsalçısıdır və tez-tez maraqlı yeniliklər edir. Bu dəfə çips həvəskarları üçün maraqlı bir yenilik təqdim olunub. Şirkət barmaqlarınızı Lay’s çipslərini yedikdən sonra təmizləmək üçün təmizləyici qurğu təqdim edib. Qurğu paltaryuyan maşın formasında hazırlanıb, lakin daha kiçik ölçüdədir. Daxili konstruksiyası təbii ki daha sadədir və baraban yoxdur. İstifadə üçün barmaqlarınızı daxil edirsiniz və cihaz işə düşür.
Xarici görünüşü paltaryuyan qurğusuna bənzəsə də, təmizləmə prosesi kifayyət qədər sadədir. Cihazın önündən barmaqlarınızı içəri salmaq üçün “lyuk” mövcuddur. Həmçinin cihazın üzərində ekran paneli, rejim seçmək üçün dairəvi düymə vəs yerləşdirilib.
Lay’s şirkətinin barmaq yuyucusu necə çalışır?
Lay’s cihazının daxilində yuxarısında yerləşən spirt əsaslı yuyucu sprey var. Cihazın aşağısında isə istifadə edilən mayenin axıdılması üçün xüsusi qab var. Xüsusi sensorun köməkliyi ilə cihaz barmağın içəri nə zaman daxil edildiyini müəyyən edə bilir. Ardıyca cihaz təmizləyici mayeni barmaqlarınızın üstünə vurur. Yuyucu vasitə bitdikdən sonra, yuxarı hissədən doldurmaq mümkündür. Yuyulmadan sonra istifadəçi əllərini özü qurutmalıdır.
Ölçülərinə gəldikdə isə hündürlüyü 15 sm və üst qapaq örtüyünün diaqonal ölçüsü isə 11 sm təşkil edir. Şarj üçün sadə Type-C kabeli istifadə olunur. Hal-hazırda bu qurğunu almaq təəsüf ki, mümkün deyil. Cihaz limitli şəkildə cəmi 5 ədəd istehsal olunub. Bu cihazlar isə Yaponiyada Lay’s təfərindən keçirilən lotoreya vasitəsi ilə hədiyyə veriləcək.
Qurğu qısa olaraq desək Lay’s həvəskarları çipsi yedikdən sonra barmaqlarını rahatlıqla təmizləmək üçün hazırlanıb. Yalnız tələbat çox olarsa, o zaman bəlkə çips şirkəti bu qurğusunu kütləvi istehsala çıxara bilər. Bizə isə yalnız gözləmək qalır.
