Amerika futbolunun çempionat oyunu olan Super Bowl hər il ABŞ-da ilin ən çox baxılan televiziya yayımıdır. Buna görə də böyük şirkətlər Super Bowl zamanı reklamlarını yayımlamaq üçün milyonlarla dollar xərcləyirlər. Bəzən məşhurların da yer aldığı bu reklam çarxları ümumiyyətlə Super Bowl həftəsində böyük səs-küy yaradır. Bu il Super Bowl həftəsində dalğalanan reklamlardan biri də Google-un süni intellekt proqramı Gemini üçün hazırladığı kommersiya reklamı olub. Lakin, Gemini süni intellekt reklamı, hazırda Google-un heç vaxt istəmədiyi mövzularla gündəmdədir.
Gemini-nin insanlara kömək edə biləcəyi yolları göstərmək üçün çəkilmiş bu reklam çarxında kiçik biznesi olan pendir satıcısıŞ Gemini-nin ona veb saytı qurmaqda və onun üçün tanıtım materialı yazmaqda necə kömək etdiyini izah edir. Habelə, reklam bütün bu prosesləri praktiki olaraq da nümayiş edir. Hələlik hər şey normal görünsə də, bu reklamı bir az da yaxından araşdıranlar bəzi şeylərin üst-üstə düşmədiyini görüblər. İlk olaraq bu reklam çarxında Gemini-nin hazırladığı mətndə yalan məlumat olduğu diqqət çəkib. Belə ki, Gemini, Gouda pendirinin dünya pendir istehlakının 50-60 faizini təşkil etdiyini bildirib. Əslində isə bu nisbət xeyli aşağıdır. Bu səhv aşkar edildikdən sonra Google tədbir görüb və YouTube-da reklamı sakitcə redaktə edib. Lakin problemlər bununla da bitməyib.
Google-un Gemini tərəfindən yaradıldığını iddia etdiyi tanıtım mətni 2020-ci ildən bu şirkətin saytında mövcuddur. Deməli, ya Gemini açıq-aşkar plagiat edib mətni olduğu kimi internet səhifəsindən köçürüb, ya da Google Gemini modelinə aid olmayan cavabı sanki Gemini tərəfindən yazılmış kimi göstərirdi. Google bu mətnin Gemini tərəfindən yazıldığını israr edir, lakin bu iddianın çox da inandırıcı olmadığı göz qabağındadır. Çünki nə sosial media istifadəçiləri, nə də texnologiya mətbuatı bu məsələdən əmin görünmür.
