Bildiyimiz kimi, Google şirkəti ötən aylarda ciddi cərimə ilə üz-üzə qalmışdı. Belə ki, burada əsas səbəb kimi, şirkətin Chrome brauzerindəki Incognite Windows və ya gizli pəncərə funksiyanın heç də gizli olmaması idi. Ötən aylarda ortaya çıxmışdı ki, Google şirkətinin gizli pəncərə adı ilə fəaliyyət göstərən bu funksiyası məlumatları tamamilə gizləmir. Məhz bundan sonra isə şirkət ciddi məbləğdə cərimələrə məruz qalmışdı.
İndi isə amerika mərkəzli Google şirkəti Chrome brauzerindəki gizli pəncərə funksiyasının açıqlamasında dəyişiklik edib. Google bildirir ki, “Gizli rejimində baxış tarixçəniz, kukilər, sayt məlumatlarınız və ya formlara daxil etdiyiniz məlumatların heç biri cihazınızda yadda saxlanmayacaq. Bu o deməkdir ki, fəaliyyətiniz Chrome brauzer tarixçənizdə görünməyəcək, yəni cihazınızın digər istifadəçiləri fəaliyyətinizi görə bilməyəcək. Veb saytlar sizi yeni istifadəçi kimi görür”. Bununla belə şirkət bildirib ki, gizli rejim insanlara tam məxfilik təmin etmir. Hətta Google bu məsələni açıq şəkildə izah etdi ki, “Fəaliyyətiniz ziyarət etdiyiniz veb-saytlardan, işəgötürəninizdən və ya məktəbinizdən və ya internet provayderinizdən gizlədilmir”.
Ümumiyyətlə Google şirkəti daim istifadəçilərinin təhlükəsizliyi üçün yeniliklər edir. Məhz bu gizli rejim söhbətində isə şirkətin funksiyanı istifadəçilərə yanlış təqdim etməsi bəzi problemlərə yol açmışdı. Lakin yenə də Google şirkətinin Chrome brauzeri ən təhlükəsiz və ən etibarlı brauzerlərdən biri hesab olunur. Onu da qeyd edək ki, uzun müddətdir ki, şirkətin gizli pəncərədən istifadəni tamamilə məxfi etməsi də tələb olunur. Hələlik isə bu barədə yeni məlumat yoxdur.
