Ötən günlərdə qlobal bazarda təqdim edilən Redmi Note 13 seriyası artıq yerli şəbəkə mağazalarında rəsmi olaraq satışa çıxarılıb. Xiaomi brendinin orta büdcəli smartfon seriyası olan yeni Redmi Note 13 bir müddət əvvəl çin bazarı üçün təqdim edilmişdi. Ümumiyyətlə Xiaomi şirkətinin altbrendlərindən olan Redmi daim orta seqmentə aid smartfonları ilə seçilir və istifadəçilər tərəfindən tələb görür. Bildiyimiz kimi, yeni smartfonlar artıq HyperOS sistemi ilə qlobal bazarda eləcə də ölkəmizdə satışa çıxarılıb. İlk öncə smartfonlar MIUI ilə qutudan çıxsa da, bir müddət sonra alacaqları yenilənmə ilə interfeys dəyişəcək.
Redmi Note 13 seriyası qlobal bazarda olduğu kimi, 3 model Redmi Note 13, Note 13 Pro və Note 13 Pro+ ilə yerli şəbəkə mağazalarında satışa çıxarılıb. İlk öncə Redmi Note 13 modelindən məlumat verək. 33 Vatt şarj ilə 5000 mAs batareya, 108 MP əsas kamera və stereo dinamiklərlərə sahib olan seriyanın standart modeli həmçinin Dimensity 6080 çipseti ilə təchiz edilib. 8-256GB Midnight Black seçimi ilə smartfonun yerli şəbəkələrdə rəsmi satış qiyməti isə 549,99 manat, 519,99 manat və 499,99 manat olmaqla dəyişir.
Redmi Note 13 seriyasının digər modeli isə məhz Note 13 Pro-dur. Bu smartfon isə Snapdragon 7s Gen 2 çipi ilə təchiz edilib, 4 GB virtual operativ yaddaşa və 200 MP kameraya malikdir. Qeyd edək ki, seriyada yer alan digər cihazlarda olduğu kimi bu smartfon da daxili barmaq izi sensoru və AMOLED FHD+ 120Hz ekrana malikdir. Yerli mağazalarda smartfonun 8-256GB, 12-512GB 799.99 manat və 999.99 manat olaraq dəyişsə də, hazırda smartfonlara endirim təklif olunduğu üçün 719.99 manat və 899.99 manata əldə etmək mümkündür. Rəng seçimləri arasında isə Midnight Black, Lavender Purple, Forest Green yer alır.
Son olaraq seriyanın ən performanslı modeli olan Note 13 Pro+ modeli isə 1,5K təsvir ölçülü əyri kənarları olan AMOLED panel, 120Hz yeniləmə tezliyi və displeydaxili barmaq izi sensoruna malikdir. Smartfon, 200 MP əsas kamera, 120 Vatt sürətli enerji doldurma ilə 5000 mAs batareya, Dimensity 7200 Ultra çipseti və IP68 qorumasına malikdir. Qiymət tərəfində isə smartfon 8-256GB və 12-512GB seçimləri ilə 1149.99 manat və 1299.99 manata təklif olunur. Eynilə digər modeldə olduğu kimi Note 13 Pro+ modeli də endirim ilə 1039.99 manat və 1169.99 manata təklif olunur. Qeyd edək ki, bu cihaz Aurora Purple, Moonlight White, Midnight Black rəng çeşidlərinə sahibdir.
