Bildiyimiz kimi, artıq Samsung Galaxy S24 seriyasının təqdim edilməsinə sadəcə saatlar qalıb. Lakin hələ də yeni smartfon seriyası barədə məlumatlar gəlməyə davam edir. Belə ki, yeni ortaya çıxan məlumatlara görə məlum olub ki, Samsung Galaxy S24 7 il yeniləmə dəstəyi alacaq. Ümumiyyətlə son dövrlərdə istifadəçilərin ən çox diqqət etdikləri məsələlərdən biri məhz bu yenilənmə dəstəyinin müddətidir. Daha əvvəl Google brendi Pixel seriyalı modellərində 7 il yeniləmə dəstəyinin mövcud olacağını bildirimişdi. İndi Samsung öz həvəskarlarını sevindirərək flaqman seriyasında 7 il yeniləmə dəstəyi verəcəyini qeyd edib.
Yeniləmə dəstəyi əsasən smartfonların dəyərinin azalmasının qarşısını alır. Elə məhz istifadəçilərin bir çoxunun da Android smartfonlardan uzaq durmasının səbəblərindən biri məhz bu idi. Çünki, hər il yüzlərlə yeni Android smartfon təqdim edilir. Hətta onlardan bir çoxu eyni xüsusiyyətlərə sahib olur. Eləcə də yenilənmə dəstəyi sadəcə bir neçə ildən sonra dayandıqda istifadəçilər öz smartfonlarını dəyişərkən məcbur olub onu çox ucuz qiymətə satır. Lakin indi Samsung Galaxy S24 seriyasının 7 il yeniləmə dəstəyi alması və onun digər smartfonlardan fərqli olaraq bir çox süni intellekt əsaslı funksiyaya sahib olması dəyərinin də illər ərzində azalmasının qarşısını alacaq.
Əlavə olaraq qeyd edək ki, Galaxy AI yeni flaqman smartfon üçün kamera, divar kağızı, tərcümə və digər bir çox tərəfdə dəstək olacaq və onu təkmilləşdirəcək. Habelə gecə çəkilişi adlı yeni funksiya ilə daha az işıqlı fotoşəkilləri süni intellekt ilə emal etmək mümkün olacaq. Məhsuldar tənzimləmə adı ilə təklif olunacaq bu funksiyalar əsasən şəkillərin daha da təkmilləşməsi üçün nəzərdə tutulub. Artıq selfie edərkən arxa plandakı istənməyən əşyaları və ya şəxsləri bir toxunuşla aradan qaldırmaq mümkün olacaq. Sadəcə bir neçə saat sonra flaqman smartfon rəsmi olaraq təqdim ediləcək. Bəs siz Galaxy S24 seriyasından nələr gözləyirsiniz?
