Honda brendi Çində yeni elektromobillərini təqdim etməyə hazırlaşır. İndiyə qədər yeni elektromobillər barədə məlumat olmasa da, indi yeni honda elektromobilləri barədə görüntülər ilk dəfə ortaya çıxıb. Qeyd edək ki, tezliklə təqdim olunacaq və satışa çıxarılacaq elektrikli krossoverlər əslində eyni xüsusiyyətlərə sahib olsa da, iki fərqli şirkət tərəfindən satılacaqları üçün dizaynları da fərqlidir. Beləliklə yeni e:NP2 və e:NS2 modelləri ilk dəfə ortaya çıxıb.
Qeyd edək ki, yeni Honda elektromobilləri barədə ilk görüntülər Çinin Sənaye və İnformasiya Texnologiyaları nazirliyinin rəsmi saytında ortaya çıxıb. Sadəcə cüzi dizayn dəyişiklikləri ilə bir-birindən fərqlənən bu elektromobillər xüsusi olaraq Çin bazarı üçün hazırlanmışdır. Yeni Honda e:NS2 Donfeng tərəfindən satılacaq. Elektromobilin ön tərəfində incə bumeranq formalı LED gündüz işıqları yer alır. Həmçinin faralar arasında led işıqla Honda loqosu da mövcuddur. Aqressiv görünüşə malik elektromobilin arxa tərəfində də üfüqi led fara dizaynı yer alır.
Digər elektromobil Honda e:NP2 isə GAC ilə birlikdə satılacaq. Məhz bu elektromobilin digər modeldən fərqi isə C formalı işıqlandırmaya sahib olmasıdır. Habelə bu modeldə loqonun ətrafında parlaq qara rəngdən də istifadə olunub. Hər iki modelin təkər bazası 2735 mm-dir. Bundan əlavə sözügedən elektromobillər 200 at gücü hasil edən elektrik mühərrikinə sahibdirlər. Batareya həcmləri isə sadəcə 68.8 kVt təşkil edir. Hələlik elektromobillərin mənzil və digər texniki detalları barədə məlumat yoxdur.
