Elektromobil bazarının bu qədər inkişaf etdiyi dövrdə Avropa Birliyi elektromobillərlə bağlı yeni qərar qəbul edib. Belə ki, 2027-ci ilin fevral ayından etibarən Avropadakı bazarlarda satılan elektromobillərdən “batareya pasportu” tələb olunacaq. Qeyd edək ki, avtomobilin VIN kodu və bir QR kod bu pasportun daxilində yer alacaq. Habelə QR kod daxilində avtomobilin daha doğrusu elektromobilin bütün rəqəmsal sənədləri, onun xammalının mənşəyi, tutumu, vəziyyəti kimi istehsaldan sonrakı məlumatları da yer alacaq.
Ümumiyyətlə bu təşəbbüs, Avropa Birliyinin 2035-ci ilə qədər daxili yanma mühərriklərinin qadağan edilməsi ilə bağlı qərarının bir parçasıdır. Belə ki, Avropadakı elektromobillərdən tələb ediləcək bu batareya pasportu elektromobillərin istehsalında karbon emissiyalarının miqdarını açıqlamağa imkan verəcək. O cümlədən bu pasport ilə mərhələli bir şəkildə elektromobillərin istehsalında təkrar edilmiş materialların istifadəsini də artırmaq olacaq. Məhz bu sadalananlar, batareya pasportu daxil olmaqla Avropa Birliyinin ötən il daxili yanma mühərrikli avtomobillərin istehsalına qadağa qoyması ilə bağlıdır və bu qərarın reallaşması üçün lazımı şəraitin qurulmasına xidmət edəcək.
Batareya pasportunun mövcudluğu tədarük zəncirlərində də şəffaflığı artıracaq, ümumiyyətlə mürəkkəb və tez-tez dəyişən tədarük şəbəkələrinə işıq salacaq. Batareya pasportlarının yaradılması üzrə ixtisaslaşan Circulor-un Xarici Əlaqələr üzrə meneceri Ellen Carey bildirib ki, pasportların qiyməti hər batareyaya görə 6-11 funt sterlinq, 7.6-14 dollar və ya 7-12.8 avro arasında dəyişəcək. Habelə batareya pasportuna sahib olan elektromobillərə müxtəlif güzəştlərin edilməsi də nəzərdə tutulur.
