Statcounter tərəfindən paylaşılan yeni aylıq məlumatlar heç də təəccüb doğurmayıb. Belə ki, may ayı ərzində də brauzer bazarında heç kim Chrome ilə rəqabət apara bilməyib və ondan dəfələrlə geridə qalıb. Google tərəfindən hazırlanan Chrome brauzer bazarında hələ də birinci yerdədir.
Bazarın təxminən 65 faizini təşkil edən brauzerdən sonra bazar payı cəmi 13 faizə çatan Microsoft Edge gəlir. Habelə, üçüncü yerdə Apple tərəfindən hazırlanmış Safari, dördüncü yerdə Mozilla tərəfindən hazırlanmış Firefox, beşinci yerdə isə Opera qərarlaşıb. Brauzer tərəfində bu günlərdə ARM prosessor modelləri üçün xüsusi hazırlanmış versiyalar diqqət çəkir. Məsələn, keçən ay Arm əsaslı Windows kompüterləri üçün xüsusi Chrome versiyasından sonra Operanın xüsusi ARM versiyası elan edildi.
Qeyd edək ki, Qualcomm tərəfindən ARM arxitekturasında hazırlanmış Snapdragon X Elite prosessorlu bir çox yeni noutbuk modelləri tezliklə bazara çıxarılacaq. Bu kompüterlərdən əvvəl Chrome-un yeni versiyası hazırlanmışdır. Daha sonra Chrome ilə eyni əsası paylaşan Opera üçün xüsusi ARM versiyası elan edilib. Bu iki yeni brauzer versiyası heç bir əlavə təbəqədən istifadə etməyəcəyi üçün ARM prosessorlu noutbuklarda çox yüksək performans təklif edəcək və istifadə zamanı az enerji sərf edəcək. Microsoft Edge uzun müddətdir ki, ARM arxitekturalı kompüterləri/prosessorları dəstəkləyir və yeni dövrdə istifadəçilərə təklif olunan seçimlərin artması sevindirici haldır.
