Apple cihazları arasında fayl paylaşımını asanlaşdıran və təhlükəsiz olduğu iddia edilən AirDrop sistemi Çində sındırıldı. Belə ki, Çİnin səlahiyyətli şəxsləri tərəfindən amerikalı texnologiya nəhənginin AirDrop sisteminin təhlükəsizlik divarları aşıldı. Ümumiyyətlə AirDrop sistemində istifadə edilən simsiz əlaqə TLS şifrələməsindən istifadə etdiyi üçün təhlükəsiz hesab edilirdi. Lakin Pekin Bələdiyyəsinin Ədliyyə Bürosu BMBJ hərkəsə göstərdi ki, sistem heç də təhlükəsiz deyil.
Çin dövlət qurumu tərəfindən istifadə edilən bu zəiflik nəticəsində Apple cihazları arasında AirDrop sistemi ilə paylaşılan faylların nömrələri və e-poçt ünvanları ortaya çıxarılıb. Hətta AirDrop istifadəçilərinin telefon nömrələri də sistemdəki zəiflik səbəbi ilə aşkar edilə bilib. BMBJ-nin məlumatına görə, bu, dövlət orqanlarına qanunsuz məzmun yaymaq üçün AirDrop funksiyasından istifadə edən cinayətkarları aşkar etməyə kömək edəcək.
Onu da qeyd edək ki, AirDrop sistemindəki bu zəifliyin daha əvvəl dövlət qurumu tərəfindən istifadə edilib-edilmədiyi hələlik məlum deyil. Lakin bu, aşkar edilən ilk təhlükəsizlik zəifliyi deyil. Daha əvvəl 2021-ci ilin aprelində alman tədqiqatçıları da aşkar etmişdilər ki, həm alıcının, həm də göndərənin bir-birinin kontaktlarında qeydiyyatdan keçdiyini yoxlayan qarşılıqlı autentifikasiya mexanizmi şəxsi məlumatları aşkar etmək üçün istifadə edilə bilər. Hətta Apple bu məlumat ortaya çıxdıqdan sonra da zəifliyi aradan qaldırmadı. Yeni aşkar edilən bu zəiflik barədə isə Apple şirkəti hələlik heç bir münasibət bildirməyib.
