CES 2024 sərgisində elan edilən yeniliklər bitmək bilmir. Belə ki, bu dəfə Intel brendi özünün ən yeni və ən güclü HX seriyalı noutbuk prosessorlarını təqdim edib. Prosessor dedikdə ilk ağla gələn brendlərdən biri olan Intel 14-cü nəsil HX-Series mobil prosessorlarının üzərindəki pərdəni qaldırıb. Beləliklə brendin mövcud olan ən güclü mobil prosessoru artıq Intel-Core i9-14900HX-dir.
Ümumiyyətlə Intel ötən aylarda prosessor seriyalarının adını dəyişdirərək tamamilə fərqli dizayn yenilikləri ilə ortaya çıxmışdı. Məhz yeni təqdim edilən i9-14900HX prosessoru performans tərəfində sələflərindən fərqli performans təklif edir. Qeyd edək ki, bu mobil prosessor 8 fərqli performans nüvəsini və 16 fərqli səmərəlilik yönümlü nüvəni bir araya gətirir. Hətta bu prosessor 5,8 GHz turbo tezliyi ilə müəyyən testlərdə AMD-nin Ryzen 7945X3D prosessorunu 17 faiz üstələməyi bacarır. Məhz bu səbəbdən başlıqda da qeyd etdik ki, Intel özünün ən güclü noutbuk və ya mobil prosessorlarını təqdim edib.
Əlavə olaraq qeyd edək ki, təqdim edilən digər 14-cü nəsil HX-Series mobil prosessorları ilə birlikdə Thunderbolt 5 və Thunderbolt 4 dəstəyinə sahib olan prosessor Wi-Fi 6E və Wi-Fi 7 standartlarına məhəl qoymur. Hazırda Intel Core Ultra ailəsində 28W və 15W səviyyələrində çoxlu müxtəlif prosessorlar var ki, bu da 2024-cü ildə bir çox müxtəlif noutbuk modellərini gücləndirəcək. Görünən odur ki, bu il bir çox noutbuk süni intellekt tərəfində müxtəlif imkanlar təklif edən flaqman Intel prosessorları ilə təchiz ediləcək.
