Apple şirkətinin uzun müddətdir üzərində çalışdığı elektrikli avtomobil layihəsi olan Apple Car artıq ləğv edilib. Belə ki, ABŞ mərkəzli texnologiya nəhəngi Porject Titan layihəsini dayandırdığını açıqlayıb. Bloomberg mənbəsinin məlumatına görə, şirkət məhsuldar süni intellekt tərəfinə fokuslanacaq. Ümumiyyətlə son dövrlərdə Xiaomi kimi texnologiya nəhənginin də elektromobil təqdim etməsi bütün gözləri Apple-a tərəf çevirmişdi. Lakin Apple bu işin altından qalxa bilmədi.
Apple ötən gün əməkdaşlarına bildirib ki, Project Titan komandasındakı 2000 nəfər məhsuldar süni intellekt araşdırmalarına qatılacaq. Bloomberg-in məlumatına görə, Apple şirkətinin baş əməliyyat direktoru Jeff Williams və layihənin vitse-prezidenti Kevin Lynch, işçiləri layihənin dayandırılması barədə məlumatlandırıblar. Layihənin dayandırılması nəticəsində ixtisarların olacağı bildirilsə də, bu say hələ dəqiq deyil.
Uzun müddətdir ki, Apple-ın öz elektromobilini hazırladığı məlumdur. Əlbəttə layihədə problemlər və qeyri-müəyyənliklər olsa da, son xəbərlər Apple şirkətinin hələ də Apple Car layihəsi üzərində çalışdığını göstərirdi. Bu ayın əvvəlində isə Wired mənbəsi bildirmişdi ki, Apple 2023-cü ildə inkişaf etdirdiyi avtonom idarəetmə texnologiyasından istifadə edərək 70.000 kilometrdən çox məsafə qət edib. Bloomberg isə ötən ay layihənin 2028-ci ilə təxirə salındığını bildirmişdi.
Ümumiyyətlə Apple-ın Project Titan adlı gizli avtomobil layihəsi haqqında şayiələr ilk dəfə 2015-ci ildə ortaya çıxmışdı. Məhz bu dövrdə hələ elektromobillər sənayedə elə də güclü mövqeyə sahib deyildi. Apple layihə üzərində işləmək üçün Tesla-nın keçmiş Autopilot proqram təminatı direktoru kimi əhəmiyyətli şəxsləri işə götürmüşdü. Lakin görünən odur ki, şirkət bu illər ərzində bir sıra maneələrlə üzləşib.
