Beləliklə, Microsoft şirkətinin Copilot çatbotu artıq sadəcə Windows 10 və 11 sistemli kompüterlərdə deyil, Android cihazlarda da standart köməkçi olacaq. Qeyd edək ki, Mishaal Rahman adlı analitik bildirib ki, artıq Microsoft Copilot proqramı smartfonlarınızda standart köməkçi olaraq təyin edilə bilir. Xatırladaq ki, ötən il Microsoft, süni intellektlə işləyən bir çox faydalı funksiyalar təklif edən Copilot tətbiqini Android üçün təqdim etmişdi.
Qeyd edək ki, Microsoft Copilot tətbiqi ilə istifadəçilər suallarına cavab tapa, məzmun yazdıra, vizual görüntü yarada və digər faydalı işləri yerinə yetirə bilərlər. Tətbiqin yeni Beta versiyası ilə Microsoft süni intellekt köməkçisini cihazın standart rəqəmsal köməkçi tətbiqi kimi təyin etmək seçimini təklif etməyə başlayıb. Beləliklə, cihazınızda Copilot köməkçisini standart olaraq təyin etdikdən sonra onu istənilən pəncərədə sadəcə bir neçə saniyəyə istifadə etmək imkanı əldə edəcəksiniz. Copilot hazırda digər rəqəmsal köməkçilər kimi funksional deyil.
Power/Home düyməsinə uzun basmaqla və ya ekranın küncündən diaqonal sürüşdürməklə açılan Copilot nə ekranı təhlil edib ekrandakı məzmuna uyğun funksiyalar təklif edir, nə də Google Assistant və ya yeni adı ilə Gemini kimi istifadəçi girişini avtomatik dinləmir. Microsoft-un sabit versiyada Copilot-u standart rəqəmsal köməkçi kimi təyin etmək seçimini nə vaxt təklif edəcəyi barədə məlumat mövcud deyil. Həmçinin Microsoft şirkətinin Copilot tətbiqini Android cihazlarda olduğu kimi iOS cihazlarda standart köməkçi olaraq təklif edib-etməyəcəyi məlum deyil.
