Bəlkə də çoxlarınız Azərbaycanda xüsusilə orijinal lüks brendlərin alış-satış platforması olduğunu ilk dəfədir eşidirsiniz. Bəli, ölkəmizdə lüks brendlərin geyim və aksesuarlarını alıb-satmaq üçün rəsmi olaraq fəaliyyət göstərən yerli bir platforma mövcuddur. Aydın məsələdir ki, həmin platforma bu dəfəki müsahibəmizin qonağı olan Azərbaycanın yerli Garderapp startapıdır. Lüks brendləri almaq və satmaqla bağlı bütün çətinlikləri ortadan götürən platforma məhsulların orijinallığının mütəxəssislər tərəfindən yoxlanılması, alıcı-satıcı məxfiliyinin tam qorunması və alınmış məhsulların 1 gün ərzində pulsuz çatıdırlması kimi vacib xüsusiyyətləri özündə birləşdirir.
2021-ci ildə Abbasqulu Ağazadə və Nazilə Heydərova tərəfindən təsis edilmiş Garderapp, bu il ABB Innovasiya Mərkəzinin rezidenti olmağı bacarmışdır. Belə ki, Garderapp və yeni adı ilə Reluxe startapı ilə olan müsahibəmizi bu məqaləmizdə sizlərlə bölüşürük.
Aşağıdakı suallar “Garderapp” həmtəsisçisi Abbasqulu Ağazadə tərəfindən cavablandırılıb:
“Garderapp” startapı hansı işi görür? Qısa olaraq startapınızı necə təsvir edə bilərsiniz?
Garderapp (yeni adı Reluxe), insanlara ikinci əl və yeni geyimlərin alış-verişini etmək, trendi kəşf etmək kimi imkanlar verir. Qiymət yüksəkliyinə görə əlçatmaz görünən lüks brend geyim və aksesuarları hər kəs üçün əl çatan edir. Garderapp-ın bazarda olan digər elan platformalarından fərqi məxfilik sistemi, paketləmə və çatdırılma kimi üstünlükləridir. Belə ki, alıcı və satıcıların məxfiliyi tam qorunduğundan və və məlumatları gizli saxlanıldığından insanlar rahatlıqla və çəkinmədən bu platformadan alış-veriş edirlər.
– Startapınızın əsas məqsədi nədir?
Məqsədimiz xanımların daha lüks brendləri uyğun qiymətə əldə etmələri və istifadə etmədikləri geyim və aksesuarları sataraq ondan pul qazanmalarını təmin etməkdir. Üstəlik bunların hamısı rahat şəkildə təşkil olunmalıdır ki, satıcılar oturduqları yerdən pul qazansınlar, alıcılar isə sifariş etdikləri məhsulu tam ödənişsiz şəkildə qablaşdırma və pulsuz çatdırılma ilə əldə etsinlər. Bizim əsas məqsədimiz bütün xanımların dəbə əlçatanlığını mümkün olduğu qədər rahat və keyfiyyətli şəkildə təmin etməkdir.
– Növbəti 3 ildə startapınızla bağlı planlarınız nələrdir?
Növbəti illər üçün planımız əvvəlcə Azərbaycanda ən çox seçilən geyim platforması olmaq, daha sonra isə ölkəmizdən kənardə fəaliyyət göstərərək xidmətlərimizi bütün dünya xanımlarının istifadəsinə verməkdir. Hədəfimiz isə Azərbaycandan çıxmış (exit) ən böyük startap olmaqdır.
– Digər startap təsisçilərinə hansı tövsiyyələriniz var?
Əgər yeni startap təsis etməyə başlayırsınızsa ilk öncə məhsulun gəlirliliyinə yox, inkişafına fokuslanın. Özünüzə və məhsulunuza nə qədər güvənsəniz, məhsulunuzu bir o qədər də uğurlu inkişaf etdirəcəksiniz. Hər şeyi bir kənara qoyub müştərilərinizin problemlərini dinləyin. Məhsulunuz yetərincə funksional olmaya bilər amma müştərilərinizə bunu yansıtmadan onların istəklərini həyata keçirməyə çalışın.
– Sizi ilhamlandıran şəxs kimdir? (Elon Musk, Steve Jobs, və.s)
Tam olaraq kimdənsə ilhamlandığımı dəqiq şəkildə bildirə bilmərəm. Lakin demək olar ki, bütün uğur qazanmış məşhur startapçıların həyatı və çətinlikləri barədə məlumatlıyam və hərəsindən az-az ilham almışam. Startap yaratma prosesində çətinlik çəkənlərə isə həm ilham alacaqları, həm də məlumatlanacaqları, özümə də çox faydası olan şəxslərdən İmran Bağırov və Mustafa Namoğlu kimi startapçıların adını çəkə bilərəm.
