“İnnovasiya və Rəqəmsal inkişaf Agentliyi” publik hüquqi şəxsin İdarə Heyətinə sədr təyin olunub. Belə ki, rəqəmsal inkişaf və nəqliyyat naziri Rəşad Nəbiyevin müvafiq qərarına əsasən bu vəzifəyə İnarə Vəliyeva təyin edilib. Xatırladaq ki, İnarə xanım 2021-ci ilin oktyabr ayından agentliyin sədri vəzifəsini müvəqqəti icra edirdi. Məhz onun rəhbərliyi altında son 2 ildə onlarla uğurlu layihələrə də imza atılmışdır. İndi isə İnarə xanım bu uğurunu agentliyin sədri olaraq təyin edildikdən sonra da davam etdirəcək.
Ümumiyyətlə, İnnovasiya və Rəqəmsal İnkişaf Agentliyi Azərbaycan Respublikasının Prezidenti cənab İlham Əliyevin 11 oktyabr 2021-ci il tarixli Fərmanına əsasən, Rəqəmsal İnkişaf və Nəqliyyat Nazirliyinin tabeliyində publik hüquqi şəxs kimi yaradılmışdır. Habelə İnnovasiya və Rəqəmsal İnkişaf Agentliyi ölkədə rəqəmsal transformasiya sahəsində fəaliyyətin təşkili, yerli innovasiya mühitinin formalaşdırılması, ekosistemin gücləndirilməsinə xidmət edir.
Nüvə elmi və texnologiyalarının sınaq təcrübələrini aparmaq, fiziki və hüquqi şəxslərə innovasiya yönümlü elmi-tədqiqatlarına və innovativ layihələrinə (Startapları) dəstək vermək, müasir texnologiyaların və texnoloji həllərin əldə olunmasında yardım göstərərək ölkədə İKT sahəsində əlçatan təhsil və karyera imkanlarını təmin etmək, rəqəmsal hökumət və rəqəmsal cəmiyyətin qurulması və təşkilini həyata keçirmək Agentliyin prioritet istiqamətləridir. Onu da qeyd edək ki, 2021-ci ilin oktyabr ayından Rəqəmsal İnkişaf və Nəqliyyat Nazirliyinin təşəbbüsü ilə İnnovasiya və Rəqəmsal İnkişaf agentliyinin nəzdində “Technest” təqaüd proqramı yaradımışdır. Hazırda isə bu proqram uğurla davam edir.
Habelə agentlik son 2 illik fəaliyyəti boyunca “Rəqəmsal Azərbaycana doğru” layihəsi ilə regionlarda rəqəmsal savadlılığın artırılması, İKT üzrə bilik və bacarıqların inkişaf etdirilməsi, regionun İKT sahəsində mövcud potensialının ölçülməsi, daimi monitorinqə əsasən tədbirlərin görülməsi və inkişafa dəstək göstərilməsi məqsədilə həyata keçirir. O cümlədən Texnopark, Relokasiya proqramı, IDDA Awards və digərləri İnarə xanımın rəhbərliyi altında uğurla davam etdirilmiş layihələrdəndir.
