Bildiyimiz kimi, Azərbaycanın ilk vençur kapitalı fondu “Caucasus Ventures” ötən ilin sonunda yaradılıb. Rəqəmsal İnkişaf və Nəqliyyat Nazirliyinin strukturunun yenidən qurulması və rəqəmsal inkişaf yolunda müxtəlif layihələrə dəstək verməsi səbəbindən bu fondun yaradılması qaçılmaz olub. Startap ekosisteminin əsas təsisçilərindən və oyunçularından biri olan Məmməd Kərimin təsis etdiyi fond ölkəmiz üçün çox uğurlu biznesdir. Caucasus Ventures-in kapitalı 11,3 milyon manatdır. Fonda Rəqəmsal İnkişaf və Nəqliyyat Nazirliyi 5 milyon manat, “PAŞA Holdinq” Şirkətlər Qrupu 5 milyon manat, fərdi sahibkarlar isə 1,3 milyon manat investisiya yatırıb. Fondun əsas məqsədi həm Azərbaycanda, həm də regionda startaplara investisiya qoymaqdır. İndi isə Caucasus Ventures əlavə 3 startapa PERKSKIT, TASS Vision və BERKM inc kimi startaplara yatırım edib.
Caucasus Ventures-in əsas diqqəti Qafqaz, Türkiyə, Şərqi Avropa və Mərkəzi Asiyadır. Fond əsasən bu regionlarda Saas, Fintech və digər startaplara sərmayə qoymağı hədəfləyir. Caucasus Ventures iki mərhələdə startaplara sərmayə qoyur. Birinci mərhələdə investisiyanın həcmi 50 min dollara qədər, ikinci mərhələdə isə 200 min dollara qədərdir. Qeyd edək ki, Azərbaycan mərkəzli PERKSKIT startapı şirkətlərə fərdi seçimlər əsasında işçilərin mükafatlarını səmərəli şəkildə idarə etməyə imkan verən həll təklif edir. Öz növbəsində Özbəkistan startapı TASS Vision təhlükəsizlik kamerası görüntülərini, real vaxtdakı məlumatlara çevirərək müştərilərin təhlil olunmasında yeni həll təklif edir.
Daha əvvəl fond 3 startapa Tripsome, Klipy və Jobescope-a yatırım etmişdi. İndi isə Caucasus Ventures daha 3 startapa yatırım edib. Bu startaplardan sonuncusu isə BERKM inc-dir. ABŞ mərkəzli bu startap ekoloji problemləri həll edərək, qablaşdırmada plastikdən istifadəni azaltmaq üçün innovativ həllər gətirir. Bundan əlavə Caucasus Ventures daim yeni və innovativ startaplara dəstək olmağa davam edəcək.
