Missiyası insanlara oyunlar vasitəsilə öyrənmək, sınaqdan keçirmək və birlikdə yaratmaq imkanı vermək olan Global Game Jam hakatonu bu il də ölkəmizdə keçiriləcək. “GGJ” dünyanın yüzdən çox ölkəsində fiziki və virtual məkanda on minlərlə iştirakçını bir yerə yığan dünyanın ən böyük oyun yaratma tədbirlərindən biridir. 2020-ci ilin yanvar ayı 118 ölkə və 934 məkanda bir həftə sonu ərzində bu hakatonda 9601 oyun yaradılaraq maraqlı bir rekorda imza atıldı. 2021-ci ilin yanvar ayında qlobal pandemiya ilə əlaqədar olaraq GGJ yalnız onlayn formatda keçirildi. Bununla belə 104 ölkədə 585 fərqli virtual məkandan olan 6,383 oyunla möhtəşəm bir tədbir keçirməyə nail oldular. 2022-ci ildə isə 100 ölkədə 681 saytda 33 mindən çox iştirakçı qeydiyyatdan keçmişdi.
Game Jam insanların qısa müddətə bir araya gəldiyi və seçilən bir mövzu ətrafında oyun hazırlamağa başladığı bir konseptə malikdir. Hakaton adətən hər ilin yanvar ayının son cümə günü günortadan sonra başlayır və tam olaraq 48 saat davam edir. Bu müddət ərzində bütün dünyadakı bütün iştirakçılardan eyni mövzuya əsaslanan oyunlar hazırlamaları xahiş olunur və oyunlar bazar günü günortadan sonra tamamlanır.
Qeyd etmək lazımdır ki, GGJ yeni dostluqlar qurmağa, həvəsli oyun tərtibatçılarının inamını artırmağa və insanlar arasında əlaqələrin artmasına kömək edir. GGJ rəqabətə deyil, əməkdaşlığa və yoldaşlığa həsr olunub. Global Game Jam və GGJ NEXT tədbirləri San Luis Obispo, Kaliforniya, ABŞ-da birləşmiş beynəlxalq qeyri-kommersiya şirkəti olan Global Game Jam, Inc. tərəfindən keçirilir.
Global Game Jam hakatonu bu il 3-5 fevral tarixlərinə təsadüf edəcək. Eyni zamanda tədbir ölkəmizdə də baş tutacaq. Verilən 2 günlük müddət ərzində iştirakçılar mövzuya uyğun oyunlar hazırlayacaqlar. Hakatonun sonunda isə uğurlu iştirakçılar iş təklifləri qazana bilərlər. Hakatonda iştirak üçün linkə daxil olaraq qeydiyyatdan keçə bilərsiniz.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
