Artıq bir müddətdir ki, Azərbaycanda təmassız ödəniş texnologiyalarının inkişafı istiqamətində müxtəlif addımlar atılır. Elə qısa bir müddət əvvəl Google Pay-in istifadəyə verilməsi belə təmassız ödənişlərin rahatlığını əhəmiyyətli dərəcədə yaxşılaşdırmışdır. İndi isə əsas məsələlərdən biri ictimai nəqliyyatda onlayn və təmassız ödəniş metodlarını istifadəyə verməkdir. Belə ki, ölkəmizdə bu sahədə ilk addımlardan biri nəhayət VISA tərəfindən atılır. VISA, ictimai nəqliyyatda təmassız ödəniş üçün “Mobility & Transit Transaction” texnologiyasını Azərbaycanda işə saldığını bildirir. Mərkəzi Asiya və Azərbaycan üzrə VISA-nın Vitse-prezidenti olan Cristina Doros bu barədə məlumat yayıb.
İlkin mərhələdə Bakı şəhərətrafı dəmir yolunun 14 stansiyasında “VISA MTT” təmassız ödəniş üsulu artıq aktiv edilib
Beləliklə, istər VISA bank kartınızın özü, istər bank kartınızın qeydiyyatlı olduğu NFC dəstəyinə malik cihazlarınızla təmassız ödənişi həyata keçirmək mümkün olacaq. Bunun üçün cihazınızın sadəcə NFC xüsusiyyətini dəstəkləməsi kifayətdir. İlkin mərhələdə Azərbaycan Dəmir Yolları ilə əməkdaşlıqda Bakı şəhərətrafı dəmir yolunun 14 stansiyasında aktiv edilmiş texnologiyanın hal-hazırda aktiv olduğu bildirilir.
Bakı şəhərətrafı dəmir yolundan başlayaraq tətbiq olunan sistemin tezliklə Bakının bütün ictimai nəqliyyatını əhatə etməsi planlaşdırılır. Cristina Doros həmçinin, Azərbaycanda təmassız ödəniş metodlarının inkişafı yönündə olan addımlardan məmnun olduğunu qeyd edir. Bir müddət əvvəl Bakı Metropoliteni rabitə xidmətinin rəisi Elçin Məmmədov da QR kod, bank kartları, onlayn ödəniş metodları (GPay, Apple Pay) vasitəsilə ödənişlərin həyata keçirilməsinə hazırlığın uğurla tamamlandığını bildirmişdi. Ona görə də artıq praktikada fəaliyyətə başlayan yeniliyin bütün ictimai nəqliyyatı əhatə etməsi yəqin ki, çox çəkməyəcək.
