Hazırda ölkəmiz dünyanın ən prestijli tədbirlərindən birinə ev sahibliyi edir. Belə ki, 74-cü Beynəlxalq Astronavtika Konqresində bir çox texnologiya nəhəngləri də iştirak etdi. Hətta onlar özlərinin kosmik gəmilərini və texnologiyalarını konqresdə sərgilədilər. O cümlədən IAC 2023 tədbirində gələcəkdəki planlar ilə bağlı da bəzi açıqlamalar verildi. Bu planlardan biri də ötən gün Elon Musk tərəfindən tədbirdə açıqlandı. Belə ki, 74-cü Beynəlxalq Astronavtika Konqresində virtual olaraq iştirak edən Elon Musk Starship gəmisinin Marsa nə zaman uçacağını iştirakçılara açıqlayıb. Milyarder bunu 74-cü Beynəlxalq Astronavtika Konqresində Beynəlxalq Astronavtika Federasiyasının prezidenti Kley Mouri ilə söhbəti zamanı qeyd edib.
Xatırladaq ki, Elon ilk dəfə 2016-cı ildə Starship gəmisini təqdim etmişdi. Həmçinin bu zaman SpaceX şirkəti kosmik gəminin marsa pilotsuz olaraq 2022-ci ildə, insanlar ilə birlikdə isə 2024-cü ildə eniş edə biləcəyini açıqlamışdı. Təbii ki, şirkət qlobal pandemiya və digər səbəblərdən bu sözünü tuta bilməsə də, onu yerinə yetirmək üçün gecə-gündüz çalışır. Hətta Elon Musk bildirib ki, Starship 3-4 il ərzində Marsa enə biləcək. İlk Starship gəmisi apreldə test uçuşu zamanı idarədən çıxıb məhv olduqdan sonra SpaceX, hazırda 8.000 ton qaldırma gücü olan dünyanın ən güclü “ikinci” Starship roketini icazələri alıb təkrar uçurmağa çalışacaq.
Əslində kosmosa səfər etmək göründüyündən daha çətindir. Çünki, bu proses olduqca uzundur. Siz kosmik gəminin bütün xırda detallarını elə dizayn etməlisiniz ki, o orbitə çıxarkən üzləşdiyi maneələri rahatlıqla dəf etsin. Məhz SpaceX şirkəti bunu ilk cəhddə bacara bilməmişdi. Nəhəng kosmik gəmi aprel ayından uğursuz nəticə göstərmişdi. İndi isə şirkət gözləntiləri biraz daha azaldaraq kosmik gəmini marsa göndərməyi planlayır.
