Çinin Sany şirkəti 15 MVt gücündə dünyanın ən böyük yerüstü külək turbinini quraşdırıb. Bildirilib ki, yeni turbin ən böyük blok tutumu və yerüstü külək turbinləri arasında mövcud olan ən böyük rotor diametrinə görə rekordlar qırıb.
Çin mərkəzli nəhəng tikinti və avadanlıq istehsalçısı Sany Group, enerji sektorunda əhəmiyyətli bir addım ataraq dünyanın ən böyük yerüstü külək turbinini qurduğunu açıqlayıb. Şirkətin oktyabrın 9-da verdiyi açıqlamaya görə, Çində istifadəyə verilən bu nəhəng 15 MVt külək turbininin Çin şirkətlərinin məhdudiyyətləri aşmağa davam edəcəyini göstərir. Çin şirkətləri artıq dünyanın ən böyük üzən dəniz külək platformasını, eləcə də ən böyük dəniz külək turbinlərini quraşdırmaqla uğur əldə ediblər. Sany Group tərəfindən təqdim edilən SI-270150 modeli tək blokda 15 MVt gücü ilə yerüstü turbinlər arasında ən yüksək tutuma malikdir. O, həmçinin 270 metr diametrli rotoru ilə dünyada quraşdırılmış ən böyük diametrli yerüstü turbin kimi diqqət çəkir. Turbin 131 metr uzunluğunda qanadıyla daha bir rekord qırır. Bu nəhəng gücə malik bir blok bir il ərzində 160.000 ev təsərrüfatını təmin etmək üçün kifayət qədər elektrik enerjisi istehsal edə bilər.
Sany bildirir ki, bu turbin prototipdir və onun etibarlılığı gələn il ərzində müxtəlif sınaqlardan keçirilərək tam yoxlanılacaq. Dizayn ömrü 25 ilə 30 il arasında olan turbin, yüngül quruluşu və ağıllı yük azaltma texnologiyaları ilə diqqət çəkir. Bu texnologiyalar sayəsində turbinin ümumi yükü azalır və onun quruda uzun məsafələrə daşınması asanlaşır. Şirkət turbinin istehsal prosesində yeni texnologiyalardan istifadə etdiyini bildirir. Xüsusilə uzun məsafələrdə avtomatik infuziya texnologiyası, böyük kompozit qanadlar və təkrar emal edilə bilən poliuretan struktur hissələri üçün istifadə edilən üçölçülü dizayn texnologiyası istehsal prosesini daha səmərəli edərək, ətraf mühit üzün zərərsiz hala gətirib.
