Samsung istehsal texnologiyasında əhəmiyyətli dəyişiklik edərək istifadəçilərinə ən innovativ cihazları təqdim etmək niyyətindədir. Belə ki, sənaye mənbələrindən əldə edilən yeni məlumatlara görə, Samsung 2025-ci ilin əvvəlində istehsal müəssisələrində əhəmiyyətli dəyişikliklər edərək 2nm texnologiyasına keçəcək.
Samsung Electronics yarımkeçirici istehsalında mühüm bir addım atıb və tez bir zamanda 2nm istehsal xəttinin yaradılması üçün işə başlayıb. Sənaye mənbələrindən alınan məlumata görə, Hwaseong-dakı “S3” tökmə zavodunda qabaqcıl avadanlıq quraşdıraraq 2nm istehsal xəttinin təməlini qoyur. Qeyd edək ki, Cənubi Koreya nəhəngi bu addım ilə 2025-ci ilin birinci rübündə ayda 7000 çip lövhə istehsal etməyi hədəfləyir. Bundan əlavə, şirkətin Pyeongtaek Plant 2-dəki “S5” tökmə zavodunda 1,4 nm istehsal xəttinin tikintisi də planlaşdırılır. Bu xəttin 2025-ci ilin ikinci rübünə qədər 2000-3000 çip lövhə istehsal edəcəyi gözlənilir. Həmçinin bildirilir ki, ilin sonuna qədər Samsung-un “S3” istehsal xəttində mövcud olan bütün 3nm xətləri 2nm-ə çevriləcək.
Qeyd edək ki, ABŞ-ın Texas ştatında Samsung-un tökmə zavodunun açılışı əvvəlcədən planlaşdırıldığı kimi 2024-cü ilin sonunda baş tutmayacaq. Avadanlıqların quraşdırılmasına 2026-cı ildə və ya daha sonra başlanması gözlənilir. Bundan əlavə, Pyeongtaek Fab 4 tökmə zavodunun planları da dəyişib. Tələbatın azalması səbəbindən zavod artıq DRAM istehsalına diqqət yetirəcək. Bütün bu dəyişikliklər Samsung-un 2025-ci ildə 2nm çiplər və 2027-ci ildə 1,4nm çiplər istehsal etmək məqsədinin bir hissəsi kimi qəbul edilir. Şirkət rəqibi TSMC ilə rəqabətdə geri qalmamaq üçün bu strategiyaları həyata keçirir. Hansı ki, 2024-cü ilin ikinci rübündə Samsung-un qlobal tökmə bazarındakı payı 11,5 faiz, TSMC isə 62,3 faizlə liderdir.
