Çinin Logon Technology şirkəti cinayətkarları ələ keçirmək üçün robot polis olan Robocop yaradıb. Topşəkilli robot saatda 35 km sürətə 2,5 saniyəyə çatan 125 kq ağırlığında tək təkərli avtomobili xatırladır. Robot silahından açdığı atəşlə cinayətkarı yerə yıxıb, hətta onu tora sala bilir.
Qeyd edək ki, Rotunbot RT-G adı verilən bu robot Çinin cənub-şərq sahilindəki Zhejiang əyalətinin Vençjou şəhərindəki ticarət zonasında sınaqlara başlayıb. Maraqlısı budur ki, Robocop Çin küçələrində polis əməkdaşları ilə birlikdə işləyib. Videoda polislərdən birinin birlikdə səyahət edərkən robotu idarə etdiyi görünür. Kadrlarda həmçinin robotun cinayətkarın yanına yaxınlaşarkən və maneələrlə dolu ərazilərdə hərəkət edərkən müstəqil şəkildə hərəkət etdiyi görünür.
Rotunbot RT-G su maneələrini də asanlıqla dəf edir. Hətta, o üzə bilir və zərbələrə qarşı davamlıdır. Cihaz yarım metr hündürlükdən düşməyə tab gətirə və pilləkənlərdən yuvarlana bilər. Cinayətkar ilə təmasda olduqda, robot xəbərdarlıq siqnalları verə, gözyaşardıcı qaz çiləyə və ya tor ata bilər. Tərtibatçının verdiyi məlumata görə, robot təsadüfi şahidlərə dəyməmək üçün maneələri və insanları ayırd edə bilir. Hazırda sınaqdan keçirilən Robocop yaxın dövrdə Çinin bütün şəhərlərində işə qoyula bilər.
