Avstraliyanın Baş naziri Anthony Albanese ötən günlərdə öz sosial media hesablarından verdiyi açıqlamada, hökumətin TikTok və Instagram kimi sosial media platformalarından istifadə üçün minimum yaş müəyyən etmək istədiyini açıqlayıb. Baş nazir Albanese uşaqları internetin risklərindən qorumaq və valideynlərə dəstək olmaq üçün sosial mediaya yaş məhdudiyyəti qoymaq istədiyini bildirib. Beləliklə, Avstraliya tezliklə yeni qərar ilə 16 yaşdan kiçik uşaqlar üçün sosial medianı qadağan edəcək.
Albanese milli Australian Broadcasting Corporation mənbəsinə verdiyi açıqlamada bildirib ki, hökumət hələlik uşaqlar üçün minimum yaş həddini 16 olaraq müəyyən etməyi düşünür. Həmçinin, aparılacaq araşdırmalardan asılı olaraq bu həddin 14 yaşa endirilə biləcəyi də bildirilib. Albanese əlavə edib ki, hökumət bu il ərzində məsələ ilə bağlı yeni bir qanun çıxaracaq və həmin qanun qüvvəyə minəcək. Maraqlısı budur ki, qanunun tətbiqi üçün yaşın yoxlanılması texnologiyası da sınaqdan keçirilir. Avstraliya belə bir qanun qəbul etsə, bu onu, azyaşlı uşaqların sosial mediadan istifadəsini qadağan edən ilk ölkələrdən biri edəcək. Xatırladaq ki, bu ilin əvvəlində Florida 14 yaşdan kiçik uşaqların sosial şəbəkələrə daxil olmasını qadağan edib.
Meta-ya məxsus Instagram və Facebook, TikTok və digər sosial media platformaları ümumiyyətlə fərdlərdən xidmətlərinə qeydiyyatdan keçmək üçün ən azı 13 yaşında olmasını tələb edir. Lakin milyonlarla yetkinlik yaşına çatmayan uşaq saxta doğum tarixi göstərərək bu xidmətlər üçün hesab aça bilər. Avstraliyada sosial mediaya yaş məhdudiyyəti tətbiq etmək üçün hökumətdən tutmuş müxalifətə qədər geniş siyasi iradə mövcududr. Ancaq bəzi ekspertlər bu təklif olunan məhdudiyyətlərin əks nəticə verə biləcəyini iddia edir. Avstraliyanın Queensland Texnologiya Universitetinin Rəqəmsal Media Araşdırma Mərkəzinin direktoru Daniel Angus, bildirib ki, “Meta və ya TikTok kimi bəzi sosial media platformalarının qadağan edilməsi auditoriyanı daha az tənzimlənən və daha az təhlükəsiz olan digər platformalara yönəldəcək”.
