Çin mərkəzli texnologiya nəhəngi Xiaomi, ötən gün yeni smartfonları və aksesuarları ilə yanaşı SU7 Ultra avtomobilini də təqdim edib. Belə ki, Çində baş tutan tədbirdə texnologiya nəhəngi yeni konsept idman avtomobilini təqdim edib. Prototip olaraq təqdim edilən elektromobil yeni rekordlar qırmaq üçün nəzərdə tutulub.
Beləliklə, Xiaomi brendi yeni SU7 Ultra ilə birlikdə oktyabr ayında Nürburgring rekordunu qırmağa çalışacaq. Ümumiyyətlə, yeni təqdim edilən Ultra modeli sələflərindən yəni sadə SU7 modellərindən daha aqressiv dizayna və daha üstün performansa malikdir. Elektromobil 3 elektrik mühərrikindən güc alır. Maraaqlısı budur ki, bu elektrikli mühərriklərin ümumi hasilatı 1548 at gücünə bərabərdir. Xiaomi-nin sözlərinə görə elektromobil 1.97 saniyəyə 100 km/saat sürətə çata bilir. Elektromobilin 200 km/saat sürətinə çatması üçün isə sadəcə 5.96 saniyə kifayət edir. Maksimal sürəti 350 km/saat olan elektromobilin çəkisi 1900 kq-dır.
Batareya gücünün 1330 kVt olduğu bildirilən iddialı elektromobil arxa tərəfində nəhəng karbon materialından hazırlanmış spoylərə sahib olub. Aerodinamik cəhətdən əsaslandığı SU7-dən daha aqressiv dizayna sahib olan modelin kütləvi istehsala buraxılıb-buraxılmayacağı isə dəqiq deyil. Xiaomi brendi ilk mərhələdə SU7 Ultra ilə Nordschleife-in dördqapılı elektrik sedan sinfində rekord qırmaq niyyətindədir. Ümumiyyətlə, hal-hazırda çində satılan SU7 elektromobili 299 at gücünə və 400 nm fırlanma anına sahib mühərriklərdən güc alır. Elektromobil 100 km/saat sürətinə 5.28 saniyəyə çata bilir və maksimal sürəti 210 km/saat-dır.
